Podemos e independentistas piden outra comisión de investigación polo Pegasus

Unidas Podemos e partidos nacionalistas e independentistas como ERC rexistraron no Congreso dos Deputados unha nova petición para crear unha comisión de investigación sobre espionaxe, centrada esta vez en aclarar a existencia dun "armazón  parapolicial" e mencionando de pasada o caso Pegasus.

A finais de abril, pouco despois de que unha información revelase a espionaxe política a decenas de políticos independentistas co sistema Pegasus, Unidas Podemos rexistrou xunto a partidos nacionalistas e independentistas unha petición para crear unha comisión de investigación sobre este caso concreto.

Esta petición non saíu adiante na Xunta de Portavoces polo rexeitamento do PSOE, PP e Vox, aínda que socios parlamentarios do Goberno como ERC insistiron na creación desta comisión tras o cesamento da directora do CNI, Paz Esteban, ao considerar que esta medida non é suficiente para pechar a crise aberta pola espionaxe política.

Agora, Unidas Podemos pediu xunto a partidos independentistas e nacionalistas como ERC a creación dunha comisión de investigación para aclarar "a vinculación de diversos estamentos oficiais do Estado e un armazón mediático, empresarial e parapolicial con recursos e armas reservadas a organismos estatais ao servizo de intereses  espurios á marxe do interese xeral e presuntamente sufragados con fondos reservados".

En concreto, a petición remitida á Mesa do Congreso asínana Unidas Podemos, ERC,  Junts, a CUP,  PdeCAT,  Bildu, BNG e  Compromís, pero non a subscriben o PNV nin Más País, que si asinaran a anterior petición.

Tras a crise entre os socios de Goberno e dos partidos que o apoian motivada polo caso Pegasus, hoxe Pedro Sánchez deu por feito que esgotará o seu mandato. O executivo, asegurou Sánchez, seguirá coa súa axenda lexislativa ata decembro do 2023.