Pogacar logra o seu terceiro Tour e gaña a súa sexta etapa

O esloveno Tadej Pogacar converteuse no gañador do Tour de Francia de 2024, o terceiro da súa carreira. Impúxose na crono definitiva en Niza, a súa sexta vitoria de etapa nesta edición, uns rexistros impresionantes que coroan a temporada perfecta de Pogacar con vitorias no Tour e no Giro de Italia, no que tamén gañou seis etapas.  

Nos 33'7 quilómetros entre Mónaco e Niza, que Pogacar coñece á perfección porque vive en Montecarlo, o esloveno voou para conseguir a vitoria de etapa malia que tiña o Tour no peto. Sacoulle máis dun minuto a Jonas Vingegaard. O gañador dos dous últimos Tours foi o segundo a 6'17 de Pogacar. Terceiro rematou Remco Evenepoel a 9'18. 

O cuarto foi o portugués João Almeida que mantivo o posto a pesar da boa crono do español Mikel Landa, que rematou de sétimo na etapa e de quinto na clasificación xeral. Outro español que entrou nos dez primeiros postos foi Carlos Rodríguez, aínda que o seu final de tour non foi bo. Ocupou a sétima praza por detrás do británico Adam Yates e por diante do estadounidense Matteo Jorgenson.