Policías e gardas civís piden ao PP parar o atropelo do Goberno ás súas competencias

Sindicatos policiais e asociacións de gardas civís pediron este luns ao líder do PP, Alberto Núñez Feijóo, que pare o "atropelo" ás competencias destes corpos que, na súa opinión, supón o acordo do Goberno con Junts para a cesión de competencias a Cataluña en materia migratoria. 

Os representantes dos axentes das forzas de seguridade do Estado trasladaron aos dirixentes do PP a súa preocupación por ese acordo, nunha reunión convocada polos populares e á que asistiron a secretaria xeral, Cuca Gamarra, e o portavoz no Congreso, Miguel Tellado.

Os axentes denuncian que a cesión das fronteiras aos Mossos pode levar a que os policías e os gardas civís desaparezan de Cataluña. O presidente do PP comprometeuse a dar a batalla xudicial contra este pacto. En cambio, desde o Goberno deféndeno.

Sindicatos e asociacións remitiron comunicados para explicar a súa posición, como fixo Jupol, maioritario na Policía Nacional, para quen o acordo con Junts supón "unha vulneración do marco constitucional, un menoscabo para a seguridade nacional e un ataque directo á presenza da Policía Nacional e a Garda Civil en Cataluña".

"Permitir que unha comunidade autónoma xestione estas competencias podería xerar desigualdades e un efecto chamada con consecuencias imprevisibles. Así mesmo, a falta de coordinación entre os distintos corpos de seguridade pode derivar nun aumento da delincuencia organizada e nunha xestión deficiente dos fluxos migratorios", subliña Jupol.

Segundo os datos analizados na reunión, a aprobación desta medida provocaría a perda de destino de centos de axentes, forzándoos a abandonar a rexión xunto coas súas familias, segundo sinala o sindicato.

Pola súa banda, o Sindicato Unificado de Policía (SUP) considerou que esa cesión sería "inconstitucional" e advertiu dos problemas que podería carrexar para a seguridade nacional unha lei que "pon en risco o control da fronteira sur de Europa e as diferentes tarefas policiais que a nivel transnacional levan a cabo diariamente entre as policías estatais".

O SUP destacou a "paradoxa" que supón elevar o persoal dun corpo autonómico -o acordo prevé aumentar o persoal dos Mossos ata os 26.800 axentes- "ata unha cifra que supón un terzo da de compoñentes de Policía Nacional para dar cobertura a unha comunidade autónoma".

Para Jucil, o obxectivo do Goberno é "reducir ao mínimo a presenza da Garda Civil e a Policía Nacional en comunidades con partidos políticos que defenden a independencia".

A Asociación Unificada de Gardas Civís (AUGC), pola súa banda trasladou tamén a Feijóo a súa "profunda preocupación" polo "impacto" que o acordo con Junts pode ter no labor do corpo, especialmente nas unidades que traballan na protección das fronteiras e a seguridade nas zonas máis afectadas pola presión migratoria.