Rescatan catro persoas atrapadas na neve na Serra de Queixa nun perigoso operativo
A Garda Civil de Montaña de Trives fixo unha travesía con esquís de dúas horas, no medio do temporal de neve, para rescatar aos ocupantes dun todoterreo
Os afectados, todos ilesos, mantiveron unha comunicación constante cos equipos de emerxencia durante as cinco horas que durou a operación de rescate
Efectivos do Grupo de Rescate e Intervención en Montaña (GREIM) da Garda Civil rescataron este domingo catro persoas que quedaran atrapadas nun vehículo debido á acumulación de neve nunha zona de difícil acceso en Chandrexa de Queixa (Ourense).
Os axentes tiveron que utilizar unha máquina pisapistas dunha estación de esquí próxima para rescatar os catro adultos que viaxaban nun todoterreo, que se atopaban ilesos.
Unha operación de rescate complexa que se prolongou durante cinco horas
Segundo apunta Axega 112 de Galicia, os implicados contactaron con emerxencias ás 18:48 horas e indicaron que o vehículo en que viaxaban non podía avanzar nin retroceder pola cantidade de neve acumulada.
En concreto, atopábase nunha pista de difícil acceso que une Camba con Manzaneda. Ata o lugar mobilizáronse efectivos da Garda Civil, GES de Castro Cadelas, voluntarios de Protección Civil de Chandrexa de Queixa e unha unidade do SEPRONA.
Ás 22:45, o GREIM localiza as persoas atrapadas e trasládaas ata a estación co apoio dunha máquina pisapistas. Os axentes do Grupo de Montaña da Garda Civil tiveron que acceder ata as persoas camiñando con esquís durante 2 horas para poder auxilialos.
O rescate finalizou ás 23:44 horas. En todo momento, os afectados mantiveron comunicación cos servizos de emerxencias.
Non é a primeira vez que teñen que realizar un rescate semellante nesta zona. Este último rescate, saíu ben e as catro persoas chegaron a casa ilesas. Os grupos de emerxencia chaman á prudencia.
.png)
