Polo menos 29 mortos nun ataque israelí contra unha escola no sur de Gaza
Polo menos 29 mortos nun ataque israelí contra unha escola no sur de Gaza
Na escola refuxiábanse desprazados
Segundo Hamas as mortes corresponden a nenos e mulleres
De momento, Israel non confirmou o ataque contra Khan Yunis
![Familiares choran xunto aos corpos dos palestinos mortos en ataques israelís no campamento de Khan Yunis (EFE/EPA/Haitham Imad)](https://img-g24-crtvg.flumotion.com/prog24/2024/20240709/israel-gaza-3.jpg)
Polo menos 29 persoas morreron e decenas máis foron feridas nun ataque israelí contra unha escola onde se refuxiaban desprazados en Khan Yunis, no sur da Franxa de Gaza, denunciaron hoxe as autoridades de Hamas no enclave.
A Media Lúa Vermella Palestina confirmou que decenas de persoas se viron afectadas tras un ataque a unha escola na zona de Abasan, ao leste de Khan Yunis, e que os seus equipos están a transportar os feridos a dous hospitais da localidade, aínda que non deu cifras de mortos nin de feridos.
O goberno de Hamas en Gaza asegurou que a maioría das vítimas son mulleres e nenos, e destacou: "Este masacre produciuse despois de que a ocupación cometese outros seis nos campos centrais, que elevaron o número de mártires a 60 durante as últimas horas", segundo un comunicado da oficina de medios do grupo islamista.
En Khan Yunis atópanse moitos dos desprazados pola invasión terrestre de Rafah, a cidade máis ao sur da franxa, onde as tropas israelís entraron a comezos de maio e onde levan operando desde aquela.
De momento, Israel non confirmou o ataque contra Khan Yunis.
As forzas israelís concentraron hoxe o lume no centro do enclave palestino, devastado tras nove meses dunha guerra que xa deixou máis de 38.000 mortos e miles de desaparecidos.
Mentres, os mediadores de Israel e Hamas atópanse negociando un pacto de tregua que permita a liberación dos 116 reféns israelís que permanecen cativos en Gaza e a entrada de axuda humanitaria ao enclave.
Pero onte, o xefe do buró político de Hamas Ismail Haniyeh dixo que os actuais ataques do exército israelí en Cidade de Gaza e o centro da franxa poderían devolver "ao momento cero" as conversacións para alcanzar un pacto.