Un ataque israelí deixa 33 persoas mortas no campo de refuxiados de Yabalia, en Gaza
Un ataque israelí deixa 33 persoas mortas no campo de refuxiados de Yabalia, en Gaza
Outras 70 persoas quedaron feridas, segundo informan medios locais
Hezbollah ataca cun dron unha residencia de Netanyahu en Cesárea cando non había ninguén no interior
Máis de 42.500 persoas morreron en Gaza dende o inicio da ofensiva israelí
Polo menos 33 persoas faleceron e 70 sufriron feridas na madrugada deste sábado nun ataque israelí no campo de refuxiados de Yabalia, no norte de Gaza, segundo medios de prensa locais.
A axencia oficial de noticias palestina Wafa sinala que fontes do hospital Al-Awda aseguran que entre as vítimas mortais hai 20 menores e mulleres.
Dende que comezou a asedio israelí nesta zona hai máis de quince días, xa morreron 500 persoas segundo o Ministerio de Sanidade do enclave, dependente de Hamás.
Pola súa banda, as forzas de defensa hebreas informan da detección de 20 foguetes disparados desde O Líbano esta noite; uns foron interceptados e outros caeron en zonas despoboadas, polo que non causaron ningún dano.
Balance de vítimas
Dende o inicio da ofensiva, máis de 42.500 persoas faleceron e 99.546 quedaron feridas no enclave, a maioría poboación infantil e mulleres.
O xefe do Estado Maior do Exército israelí, Herzl Halevi, confirma a morte de 1.500 membros da milicia xiíta de Hezbollah desde que recruaron os seus ataques contra O Líbano.
No país fronteirizo, desde o 7 de outubro de 2023, morreron preto de 2.300 persoas e máis dun millón tiveron que abandonar os seus fogares, especialmente no sur do país, por mor da intensidade dos bombardeos hebreos.
Ataque con dron a Netanyahu
Israel confirmou este sábado que un dron que impactou en Cesárea ía dirixido á residencia privada nesa cidade do primeiro ministro, Benjamín Netanyahu, pero que nin el nin ninguén da súa familia estaba na casa.
"Lanzouse un dron cara á casa do primeiro ministro en Cesárea. O primeiro ministro e a súa esposa non estaban alí e non houbo vítimas no incidente", informou un comunicado da súa oficina.
Un dron atribuído á milicia xiíta libanesa Hezbolla impactou nesa cidade da costa mediterránea, no centro de Israel, dos tres que foron detectados, aínda que os outros dous foron interceptados.
A residencia vacacional de Netanyahu en Cesárea tamén foi obxecto de numerosas protestas de israelís nos últimos dous anos, primeiro en contra da reforma xudicial e segundo para reclamar un acordo de tregua en Gaza que permita a liberación dos reféns.
.png)
