Polo menos nove mortos tras o derrubamento dunha igrexa no norte de México

Unha igrexa colapsou este domingo durante unha cerimonia en Ciudad Madero, no Estado mexicano de Tamaulipas, no norte, o cal provocou o falecemento de polo menos nove persoas e preto de medio centenar de feridos, segundo informaron as autoridades locais.

Descoñécense as causas do accidente polo cal a estrutura do edificio se derrubou durante a misa comunitaria para a realización dun bautismo. O accidente produciuse ao redor das 15:30 horas (21:30 GMT).

O suceso foi tan repentino que non deu tempo a que evacuasen o lugar. O gobernador de Tamaulipas Américo Vilarreal lamentou o sinistro en Ciudad Madero na súa conta de X. "Pedín ao secretario xeral de Goberno, ao coordinador estatal de Protección Civil e ás autoridades do sector Saúde que se despracen ao lugar dos feitos para coordinar as manobras de rescate. A miña solidariedade con todas as familias que perderon os seus seres queridos e coa comunidade por este lamentable accidente”, indicou Vilarreal.

En redes sociais difundiuse un vídeo captado por unha cámara de seguridade veciñal en que se aprecia o momento en que o teito comeza a esgazar e cae ao interior da igrexa. No lugar traballan membros de Protección Civil, da Cruz Vermella, da Garda Nacional e bombeiros, entre outros. Tamén están no lugar dous guindastres para apartar o entullo.