Pontevedra acollerá os Premios Feroz en 2025 e 2026
Pontevedra acollerá os Premios Feroz en 2025 e 2026
A presidenta da Asociación de Informadores Cinematográficos de España destacou o papel que Galicia ten no audiovisual actual
![A presidenta dos Premios Feroz e o alcalde de Pontevedra, con membros do Goberno local e representantes da Asociación de Informadores Cinematográficos, ao termo da conferencia de prensa que ofreceron este mércores en Pontevedra (@PremiosFeroz).](https://img-g24-crtvg.flumotion.com/prog24/2024/20240508/PRESENTACIONPREMIOSFEROZPONTEVEDRA.jpg)
Pontevedra será a sede da cerimonia de entrega dos Premios Feroz durante os dous próximos anos, 2025 e 2026, segundo anunciou este mércores a Asociación de Informadores Cinematográficos de España (AICE).
A primeira das citas será o 25 de xaneiro de 2025 no Recinto Feiral pontevedrés.
Nunha conferencia de prensa celebrada na cidade galega, a presidenta de AICE, María Guerra, subliñou que esta cidade "é un lugar marabilloso" para acoller esta gala, por ser "aberta, culta e complexa" e estar disposta a recibir as voces dos creadores que fan cinema e series.
"Temos unha vocación de carromato itinerante", sinalou Guerra, que explicou que con cada edición os Feroz "tentámonos abrir á sociedade", por iso é polo que a colaboración con Pontevedra non sexa só para a cerimonia, senón que sexa un "punto de encontro" durante meses.
La Asociación de Informadores Cinematográficos de España (AICE) y el Concello de Pontevedra (@Pontevedrate) alcanzan un acuerdo para celebrar las dos próximas ediciones de los Premios Feroz (2025 y 2026) en la ciudad gallega pic.twitter.com/fzYv7a6w8U
— Premios Feroz (@PremiosFeroz) May 8, 2024
Así, a organización convidará a creadores e artistas a "falar do que nos pasa como sociedade", actos sociais e culturais nos que "poderemos estar xuntos e dialogar sobre o sector".
A presidenta dos Feroz destacou o papel que Galicia ten no audiovisual actual, grazas ás súas produtoras "potentísimas" e creadores de cinema de autor "que están en todos os festivais", polo que contribuirán a ser "correa de transmisión" de todo este talento.
O alcalde de Pontevedra, Miguel Anxo Fernández Lores, sinalou que "hoxe é un gran día para Pontevedra e para Galicia" e celebrou que a cidade "será vangarda e epicentro do dinamismo e do talento" dun sector audiovisual que é un "motor de enorme relevancia".
Os Premios Feroz, segundo Fernández Lores, "encaixan en Pontevedra á perfección" e permitirán unir turismo, cultura e economía nunha "visión compartida" que irá alén dos premios.