"Non hai nada máis revolucionario que chegar ao goberno" advirte Pontón que reivindica o seu liderado no BNG

A voceira nacional do BNG, Ana Pontón, asegurou este domingo que para o seu partido "non hai nada máis revolucionario que chegar ao goberno" da Xunta e, para iso, dixo que "só hai un camiño: seguir sumando".

Na apertura da XVIII Asemblea Nacional baixo o lema "Coa túa forza, Galicia gaña", na que Pontón opta a continuar co seu liderado fronte ás candidaturas de Noa Presas e Gustavo Barcia, a dirixente nacionalista fixo un repaso da situación do partido.

Pronunciou o discurso ante unha "sala chea de ideas, de paixón e de amor por este país" con persoas que lograron sobrepoñerse aos resultados de 2016, cando o partido parecía "un barco á valga con risco de afundirse" tras lograr seis deputados no Parlamento galego, agora ten 25, e é a segunda forza, o que conseguiu da man dunha "dirección coral, forte e áxil que capitanea o BNG".

"Estamos no noso mellor momento", engadiu antes de defender que os adversarios están "máis dos nervios e máis desesperados ca nunca" fronte á "fortaleza interna" e á "radical democracia" do BNG.

Agora chega o tempo, na súa opinión, para "ir máis aló" e seguir "mellorando a organización, mellorando o traballo social e, sobre todo, disputando a hexemonía política ao Partido Popular", ao que acusa de gobernar "para as súas empresas amigas" e "para que as grandes multinacionais se forren" cun presidente, Alfonso Rueda, "desleal con Galicia".

"Galicia ten grandes problemas, pero hai esperanza", continuou e matizou que "os cambios ás veces tardan máis do que nos gustaría, pero chegarán", pois ninguén foi capaz de obter a Xunta, excepto o PP, desde as eleccións autonómicas de 2009.

Para Pontón, "neste momento histórico non hai nada máis revolucionario que chegar ao goberno" e "para alcanzalo só hai un camiño: seguir sumando máis persoas ao proxecto común".

"Que o teñan claro: imos a por todas, todos a un tempo, a por todas", dixo aos seus adversarios políticos sobre un proxecto "coas portas abertas de pau a pau a toda a sociedade galega" na que "absolutamente todas as persoas teñen cabida".

Enviou unha mensaxe sobre a soberanía galega respecto a numerosas cuestións, pois sostivo que debe ser Galicia quen decida fronte ás propostas feitas desde Madrid ou desde Bruxelas.

A voceira nacional do BNG cualificou a situación do galego como "emerxencia lingüística", #ante o que prometeu "mil primaveras máis" para o idioma. Sobre a mocidade, valorou que é "a maior garantía de futuro do BNG.

Asemblea NAcional do BNG este domingo en Compostela