Pontón urxe unha reacción internacional para terminar co "xenocidio" israelí e que a axuda chegue a Palestina

A portavoz nacional do BNG, Ana Pontón, urxe unha reacción internacional para acabar co "xenocidio" israelí en Gaza e para que chegue a axuda da Axencia de Nacións Unidas para os Refuxiados de Palestina (UNRWA), cuxa actividade foi suspendida en Israel e nos territorios palestinos ocupados a través de dúas leis que cancelan o acordo de cooperación de 1967.

En Madrid, a líder do Bloque mantivo un encontro coa directora executiva do comité español de UNRWA, Raquel Martín, no que tamén participou a senadora nacionalista Carme da Silva.

De tal forma, Pontón insta a romper relacións con Israel, á vez que lamenta que a vitoria de Donald Trump nos Estados Unidos vai reforzar o seu apoio ao Goberno de Benjamin Netanyahu.

"Desde o BNG cremos que é fundamental que a comunidade internacional reaccione para que esa axuda humanitaria poida seguir chegando e, sobre todo, que reaccione para poñer fin a un xenocidio que se está levando por diante demasiadas vidas", sostén.

Ana Pontón pide que haxa unha presión "na que sexan moitas as voces desde a comunidade internacional que freen este auténtico xenocidio" e que se poida "dicir que Palestina é libre e que se acabe con esta situación tan inxusta".