Preto de douscentos profesores de Ciencias da Terra participan nun simposio en Quiroga

Quiroga acolle durante esta semana ata 175 expertos en xeoloxía. Son os participantes nun simposio sobre esta disciplina organizado polo xeodestino Montañas do Courel e polo colectivo que aglutina os docentes desta materia en todo o ámbito estatal.

Este encontro sobre ensino da xeoloxía ten como principal fin favorecer o intercambio de experiencias educativas entre o profesorado de Ciencias da Terra. A tal efecto, realizáronse diversos talleres no instituto de Quiroga.

Laura Fernández, representante da Asociación Española para a Ensinanza de Ciencias da Terra: "É darlle recursos ao profesorado de ensino secundario para traballar a xeoloxía nas aulas dunha maneira máis práctica e atractiva para o alumnado".

É o caso dun obradoiro sobre microscopia petrográfica, onde se adaptan os microscopios dos laboratorios dos institutos para observar cortes de rochas e identificar minerais. Ou dun taller que está dirixido a que o alumnado localice fósiles de pequeno tamaño.

Álex Blanco, investigador da Universidsade da Coruña: "É un taller que pode aplicarse perfectamente en institutos para iniciar o alumnado en tarefas de paleontoloxía".

Outra das actividades propostas é unha cinta oceánica de transporte que explica de xeito ameno e sinxelo as correntes mariñas.

Eloy Cabarcos, xeólogo membro do equipo organizador: "No momento en que se conecta un acuario con outro, axiña a auga fría comeza a moverse cara a abaixo e a quente cara a arriba ata que se igualan as temperaturas. É un experimento moi fácil de levar á aula".

Ao mesmo tempo, esta edición do simposio serve para promover as Montañas do Courel, que están recoñecidas pola Unesco como Xeoparque Mundial.