Indignación nos EUA pola brutal detención policial dun mozo negro

A indignación medra nos Estados Unidos tras a difusión de varios vídeos dunha nova actuación policial de violencia extrema contra un cidadán negro por unha suposta infracción de tráfico o día 7 de xaneiro.

As imaxes amosan a brutal malleira que lle propinan cinco axentes en Memphis xa despedidos. A vítima, Tyre Nichols, de 29 anos, faleceu varios días despois no hospital.

O presidente dos Estados Unidos, Joe Biden, asegura estar "indignado" e "profundamente doído" con este episodio.

"Coma moitos, sentinme indignado e profundamente doído despois de ver o horrible vídeo da malleira que acabou na morte (do mozo)", dixo Biden nun comunicado este venres.

Entende que as imaxes, publicadas pola Policía de Memphis na tarde do venres, deixaran moitas persoas "escandalizadas", pero pide a quen "busca xustiza" que non recorra á violencia.

"A violencia nunca é aceptable, é ilegal e destrutiva", sinalou o mandatario.

O vídeo máis gráfico é o captado por unha cámara de vixilancia nun farol, onde se ve desde arriba como os cinco axentes lle dan patadas, algunha delas na cabeza, e golpean cunha porra a Nichols.

O fiscal xeral dos Estados Unidos, Merrick Garland, prometeu que haberá unha investigación e pediu que as protestas que poida haber sobre este suceso sexan pacíficas. Polo momento, os supostos autores están detidos e enfróntanse a varios cargos penais, entre eles, homicidio.

Ata o momento, rexistráronse protestas contra a violencia policial en varios puntos do país, unha delas, fronte á Casa Branca.