Proxecto para unha planta de biocombustibles en Friol

Nuns terreos de 120.000 metros cadrados situados no concello lugués de Friol e pertencentes a unha comunidade de montes son os escollidos polo grupo Greenway para pór en marcha unha planta de biocombustibles e biofertilizantes.

A empresa, que se surtiría de subprodutos das industrias gandeiras e agroalimentarias da zona, prevé un investimento de 62 millóns de euros e a creación de máis de 100 postos de traballo.

José Ángel Santos, alcalde de Friol: "As previsións iniciais da compañía establecen a creación duns 92 postos de traballo directos de diferentes perfís. Ademais, tamén calculan a creación duns 65 postos de traballo indirectos".

O proxecto está a ser moi ben acollido neste concello de pouco máis de 3.500 habitantes e os veciños cren que axudaría a fixar máis xente no rural.

"Parécenos estupendo. Todo o que veña para a vila é bo e sobre todo creando tantos postos de traballo", sinala un veciño de Friol.

"Paréceme fantástico para Friol e para a comarca. Son moitos postos de traballo e axudarían a poboar o rural. Viría xente, habería traballo e sería de marabilla", opina un veciño de Friol.

De saír adiante este proxecto de economía circular e baseado na sustentabilidade podería comezar a funcionar a comezos de 2024.