Putin busca a reelección para outros seis anos nuns comicios sen oposición real

Rusia celebra este venres a primeira xornada das oitavas eleccións presidenciais da súa historia, en que o actual xefe do Kremlin Vladimir Putin busca a reelección para un quinto mandato de seis anos. Os colexios electorais abriron onte á noite na península de Kamchatka e no distrito autónomo de Chukotka, as rexións máis orientais de Rusia, para uns comicios presidenciais en que máis de 112 millóns de rusos están chamados a votar durante os próximos tres días.

As urnas abriron ás 08:00 hora local (20:00 GMT) no extremo oriente ruso e pecharán ás 20:00 hora local (18:00 GMT) no enclave báltico de Kaliningrado nun país con once fusos horarios. Os rusos poderán exercer durante 36 horas o seu dereito ao sufraxio, algo que máis de dous millóns de electores xa fixeron por anticipado.

Segundo as sondaxes oficiais, Putin, que compite con outros tres candidatos, conta cunha intención de voto de máis do 80 %, polo que podería lograr a súa vitoria electoral máis folgada desde que chegara ao poder no ano 2000. O representante do partido Xente Nova Vladislav Davankov e o comunista Nikolai Kharitonov contan co 6 % de apoios entre os enquisados. Mentres, o ultranacionalista Leonid Slutski rolda o 5 % de apoios.

Segundo a Comisión Electoral Central (CEC), os comicios transcorrerán nas 89 rexións do país, incluídos os catro territorios ucraínos anexionados en setembro de 2022 (Donetsk, Lugansk, Khersón e Zaporizhzhia), e a tamén anexionada península de Crimea. Uns 4,5 millóns de electores poderán votar nas zonas ocupadas polo exército ruso nesas catro rexións, controladas parcialmente por Moscova.

En total, a comisión habilitou 93.644 colexios electorais, ao que hai que sumar outros 295 nos 144 países onde viven cidadáns rusos. Más dun terzo dos votantes poderá exercer o seu dereito ao sufraxio de maneira electrónica, método claramente fraudulento, segundo a oposición no exilio.

Putin, favorito por aclamación

Putin, que chegou ao poder o 31 de decembro de 1999, exerceu catro mandatos presidenciais cunha paréntese de catro anos como primeiro ministro (2008-2012). Ante a imposibilidade de exercer máis de dous mandatos presidenciais consecutivos, reformou en 2020 a Constitución aproveitando a confusión creada pola pandemia do coronavirus. Agora poderá presentarse á reelección este domingo e en 2030. Putin, de 71 anos, non só é o gran favorito á vitoria, senón que podería lograr o seu maior triunfo electoral con máis do 80 % dos votos, segundo as sondaxes.

Soldados e anexionados sen pasaporte

Más de 112 millóns de rusos —1,89 millóns no estranxeiro— están chamados ás urnas. Por primeira vez nas presidenciais votarán os habitantes das zonas ocupadas polo exército ruso nas catro rexións anexionadas. Segundo o censo electoral, trátase duns 4,5 millóns de votantes, que poderán exercer o dereito ao sufraxio mesmo aínda que carezan de pasaporte ruso. Ademais, tamén votarán en territorio ucraíno os máis de 600.000 soldados despregados na zona da chamada operación militar especial.

Sen oposición nin candidatos pola paz

Ademais de Putin, só tres candidatos concorrerán ás eleccións. O comunista Nikolai Kharitonov, o ultranacionalista Leonid Slutski e o presunto liberal Vladislav Davankov, cuxa intención de voto non supera o 6 %. O único aspirante opositor, Boris Nadezhdin, non foi rexistrado, a pesar de recoller o dobre das firmas necesarias —100.000—, por defectos de forma. Segundo a prensa independente, a Administración presidencial vetou a Nadezhdin, coñecido como o candidato pola paz, por ser o único aspirante que se opoñía á guerra en Ucraína.

Un terzo de votantes electrónicos

Por primeira vez, un terzo dos electores rusos —uns 38 millóns— poderán votar electronicamente. Os observadores independentes consideran que o voto electrónico é, en realidade, un instrumento de fraude oficialista debido á opacidade do escrutinio, como xa ocorreu nos comicios municipais de 2021. A este súmase a posibilidade de votar durante tres días, opción que a oposición ao Kremlin cre que fomenta o emprego masivo do recurso administrativo para obrigar aos rusos que traballan para o Estado a votar a favor de Putin.

Sen observadores occidentais

Rusia celebra os comicios ás costas de Occidente. O país convidou preto de 1.000 observadores internacionais, pero a ningunha das organizacións europeas que supervisan a limpeza das eleccións no continente. Moscova non convidou a Organización para a Seguridade e Cooperación en Europa (OSCE), ao que hai que sumar a ausencia dos observadores do Consello de Europa, organismo a que xa non pertence Rusia. Todo iso eleva o risco de que Occidente non recoñeza os resultados destas eleccións, en liña cos chamamentos realizados polas viúvas de Navalni e do exespía ruso Alexandr Litvinenko, asasinado en 2006 no Reino Unido polos servizos secretos rusos.