Putin ordenará o cesamento do fogo se Kíiv retira tropas do leste e o sur e renuncia á OTAN
Putin ordenará o cesamento do fogo se Kíiv retira tropas do leste e o sur e renuncia á OTAN
O presidente ruso condicional a fin dos combates a que Ucraína se retire das repúblicas de Donetsk e Lugansk e das rexións de Kherson e Zaporiyia, anexionadas por Moscova
Ucraína cre que se trata dunha "farsa" que so impón esixencias
![Vladimir Putin. REUTERS/ Maxim Shemetov](https://img-g24-crtvg.flumotion.com/prog24/2024/20240614/PUTIN_REUTERS_14_XUNHO_2024_MaximShemetov.jpg)
O presidente ruso, Vladimir Putin, asegurou hoxe que ordenará un inmediato cesamento do fogo tan pronto como Ucraína retire as súas tropas das catro rexións anexionadas por Moscova no leste e sur do país, e renuncie aos seus plans de ingresar na OTAN.
"Tan pronto como Kíiv anuncie que está disposto a esta decisión e inicie unha retirada real das tropas desas rexións e tamén comunique oficialmente a súa renuncia aos plans para ingresar na OTAN, impartirase inmediatamente da nosa parte a orde de cesar o lume e comezar negociacións", dixo Putin á plana maior do Ministerio de Exteriores, nunha intervención transmitida en directo pola televisión.
Putin subliñou que "as tropas ucraínas deben retirarse completamente de todo o territorio das repúblicas populares de Donetsk e Lugansk, e das rexións de Jersón e Zaporoyia. Entón as negociacións serán posibles". Precisou o mandatario que se refire ao territorio administrativo desas catro rexións cando Ucraína logrou a independencia da URSS en 1991, xa que a día de hoxe o Exército ruso non as controla na súa totalidade.
O líder ruso tamén asegurou que Rusia comprométese a garantir o repregamento "seguro e sen obstáculos" das unidades militares ucraínas. Subliñou que Rusia esixe unha Ucraína "neutral, fóra de bloques e non nuclear", ao que hai que sumar a desmilitarización e desnazificación do país, dous dos obxectivos marcados cando ordenou o inicio da campaña militar en febreiro de 2022.
"Sen dúbida, deben ser garantidos plenamente os dereitos, liberdades e intereses dos cidadáns rusoparlantes de Ucraína; debe recoñecerse a nova realidade territorial; o status de Crimea e Sebastopol, e as repúblicas de Donetsk e Lugansk, e as rexións de Jersón e Zaporijia como entes da Federación Rusa", engadiu.
Putin resaltou que todos estes compromisos deben ser acuñados como acordos internacionais, o que incluiría tamén "a cancelación de todas as sancións contra Rusia".
"Considero que Rusia propón unha variante que permitirá poñer fin realmente á guerra en Ucraína. É dicir, chamamos a pasar unha tráxica páxina da historia", dixo.
Ao mesmo tempo, Putin advertiu que "se Kíiv e as capitais occidentais renuncian a isto, como no pasado, serán responsables política e moralmente pola continuación do derramamento de sangue".
"Evidentemente, a situación sobre o terreo, na fronte de batalla, cambiará e non en favor do réxime de Kiev e as condicións para o inicio de negociacións será outras", subliñou.
Putin, quen volveu a denunciar que o ucraíno Volodimir Zelenski, é un presidente "ilexítimo" que está a usurpar o poder tras expirar o seu mandato o pasado 20 de maio, puxo estas condicións en véspera do cume da paz de Suíza.
Ucraína responde que é "unha farsa", non unha proposta de paz
O conselleiro da oficina presidencial ucraína, Mijailo Podoliak, refugou hoxe a oferta de Vladimir Putin e cualificouna de "altamente ofensiva".
Non é unha “proposta de paz”, senón “o paquete estándar (de esixencias) do agresor”, indicou.
Podoliak escribiu na súa conta da rede social X que “non hai novas propostas de paz por parte de Rusia. A entidade Putin formulou simplemente o ‘paquete estándar do agresor’ que xa escoitamos moitas veces”.
Segundo o conselleiro presidencial, as condicións de Putin para declarar un cesamento do fogo, que inclúen ademais da retirada ucraína dos seus propios territorios que están ocupados por Rusia a renuncia de Kiev a entrar na OTAN, son “altamente ofensivas para a legalidade internacional” e demostran a “incapacidade” da clase dirixente rusa de “avaliar a realidade de forma adecuada”.
“Punto por punto, a 'proposta da Federación Rusia' consiste en: 1. Cédenos os teus territorios. 2. Renuncia á túa soberanía e deixa de ter entidade. 3. Renuncia á túa protección (sen membresía nin alianzas)”, escribiu Podoliak, que lembrou ademais que Putin espera que se lle levanten as sancións internacionais a cambio dun acordo deste tipo.
O conselleiro presidencial ucraíno cualificou de “farsa” a mensaxe lanzada por Putin, que, a xuízo de Podoliak, demostra que quere “non pagar por esta guerra e continuala en novos formatos”.
Kíiv aspira a conseguir o máximo número de apoios posibles á súa Fórmula de Paz, un documento que esixe, entre outras cousas, a retirada completa de Rusia de todos os territorios que ocupa en Ucraína.