Putin recoñece que Rusia estivo ao bordo da guerra civil polo motin do grupo Wagner

O presidente ruso compareceu nunha homenaxe ao exército para agradecerlle que frease unha guerra civil durante a rebelión do grupo Wagner. 

Vladimir Putin recoñeceu que o financiamento da compañía militar privada de Evgueni Prigozhin corría plenamente a cargo do Estado ruso. Insinuou unha investigación sobre o uso dos cartos públicos no negocio cos mercenarios.

Pero ao mesmo tempo o Kremlin retirou os cargos contra os rebeldes, como se acordara na mediación para acabar co motín.

Nas últimas horas resolveuse a incógnita sobre o paradoiro de Prigozhin. Está exiliado en Belarús. Confirmouno o presidente Lukashenko, que asegura que foi el persoalmente quen o convenceu de deixar de avanzar cara a Moscova e de poñer fin á rebelión. Ofrécelles asilo aos combatentes de Wagner. Asegura que poden ser útiles compartindo a súa experiencia na guerra.