Reino Unido multa con 2,1 millóns de euros a TikTok por datos inexactos sobre o seu control parental

O regulador de comunicacións británico Ofcom multou este mércores a rede social TikTok con 1,8 millóns de libras (2,1 millóns de euros) por proporcionar "datos inexactos" e fóra de prazo sobre a xestión a súa función de control parental.

O pasado ano, Ofcom solicitou formalmente a TikTok e outras plataformas de vídeo que compartisen os datos sobre a súa función de Family Pairing, co obxectivo de avaliar a súa efectividade e publicala nun informe sobre medidas de seguridade para protexer os nenos de contido daniño, explica o regulador nun comunicado.

No Reino Unido as empresas reguladas deben responder por lei ás solicitudes de información de Ofcom de maneira "precisa, completa e oportuna". A pesar de que TikTok o fixo en setembro de 2023, o regulador informou a rede social tres meses despois de que "os datos eran inexactos" e que abriría unha investigación interna.

Segundo indica Ofcom na nota, descubríronse fallos nos procesos de xestión de datos de TikTok e a rede social tardou máis de tres semanas en informar o regulador sobre a inexactitude das súas informacións.

Esta demora provocou atrasos que obrigaron a excluír do informe os detalles da efectividade do control parental de TikTok, "afectando o labor de transparencia" de Ofcom, sinala o regulador.

Finalmente, TikTok comprometeuse a publicar información dunha fonte alternativa e proporcionou datos precisos, aínda que parciais, o 28 de marzo de 2024, máis de sete meses despois da data límite orixinal.

A investigación concluíu que TikTok non cooperou completamente coa solicitude de información de Ofcom e coa produción do Informe de Seguridade Infantil, o que tivo como resultado a millonaria sanción que o regulador impuxo á rede social.

O regulador sinala que a multa inclúe unha redución do 25 % porque era a primeira vez que TikTok rompía as normas de Ofcom, aceptou os achados e resolveu o caso de maneira proactiva.