Que cambios introduce a reforma laboral?

Un dos obxectivos principais da reforma laboral é a redución da temporalidade. Os contratos teñen que ser indefinidos por norma, e limita os supostos para facelos temporais. Só existirán para substituír un traballador ou por circunstancias da produción. 

Impulsa o contrato fixo+descontinuo para actividades de tempada, en vez do de obra e servizo. E impón sancións maiores para os empresarios que incumpran e abusen da temporalidade: ata 10.000 euros por cada traballador en fraude.

"Unha empresa que cometa irregularidades en contratos diferentes, será sancionada de maneira independente en cada contrato, e non como antes que era unha sanción colectiva", explica Roberto Pereira dende o Consello Xeral de Economistas.

Recupérase o poder do convenio colectivo, que xa non decae ao ano de caducar senón que estará en vigor ata novo pacto. E en materia de salarios, manda o convenio sectorial e non o da empresa.

"As empresas que externalizan servizos e que estaban pagando por baixo do convenio sectorial, teñen un ano de prazo para actualizar as retribucións", explica o secretario xeral de UXT Galicia, José Antonio Gómez. 

Gómez engade que os estudos que manexan, conclúen que esta medida vai supoñer "incrementos salariais moi importantes", que cifra entre "os mil e os sete mil euros".

Na reforma poténcianse e flexibilízanse os ERTE para evitar despedimentos, que son un dos puntos que quedaron sen reformar. "Iso de momento está perfectamente estipulado na reforma laboral de 2012" di o presidente da Confederación de Empresarios de Galicia, Juan Manuel Vieites. 

Para o presidente da CEG, esta reforma "dá estabilidade" e cre que é "boa para todos, para traballadores e para empresarios".