Repunta a venda de disfraces para a noite do Samaín
Repunta a venda de disfraces para a noite do Samaín
Reactívanse as celebracións desta tradicional festa do outono
Nas tendas recuperan a actividade, e as cifras das vendas mesmo superan as de anos previos á pandemia
Triunfan os traxes dos protagonistas das series de ficción, pero a temática do medo segue sendo a máis solicitada
Ademais do Día de Defuntos, a noite do 31 ao 1 de novembro celébrase o Samaín. Este ano reactívanse as celebracións desta tradicional festa e nas tendas de disfraces hai moita actividade estes días previos e aseguran que as cifras das vendas mesmo superan as de antes da pandemia.
Queda pouco tempo e toca buscar disfrace para as festas infantís do Samaín, que xa se adiantan á tarde do venres. Apurando as últimas horas algúns téñeno moi claro e outros aínda están un chisco indecisos. Pero todos teñen ganas de recuperar esta festa tradicional do outono.
Nas tendas especializadas en disfraces din que a actividade é moi intensa nestas xornadas previas e que a xente está moi animada con volver a disfrazarse na noite máis terrorífica do ano.
Os máis buscados son os traxes das personaxes das series de ficción de moda e agárdase que este ano as rúas se enchan de fundas vermellas.
Unha tradición pagá que se remonta á cultura celta
Unha noite de medo e escuridade que conecta o mundo dos vivos cos mortos nunha tradición pagá que se remonta á cultura celta. Unha festa para os pequenos pero tamén para os adultos.
Noite meiga a do Samaín que segundo a tradición festexa o cambio de estación, o paso do verán ao inverno e seica os nosos antergos tamén se enmascaraban para espantar os malos espíritos coas cabazas, nabos ou remolachas.
Os máis pequenos buscan os disfrace das personaxes das series de moda.
