Roberto Blach e Mauro Barreiro correrán o WRC Júnior en 2023

Co apoio da Real Federación Española de Automobilismo, o Consello Superior de Deportes e os patrocinadores que o acompañaron durante gran parte da súa traxectoria deportiva, como son Logista, o Concello de Arteixo e Clickfer, aos que se suma Sparco; Roberto Blach Jr. e Mauro Barreiro competirán a próxima tempada na categoría de entrada ao World Rally Championship, o Junior WRC, converténdose ademais no primeiro equipo galego dentro da estrutura do Rally Team Spain. 

Este proxecto deportivo levará ao Rallye Team Spain a tentar revalidar o título mundial logrado na tempada 2019, na que o propio Mauro Barreiro xa foi un dos partícipes do devandito éxito.

O Junior WRC terá novamente un esquema de cinco citas, arrincando o próximo mes de febreiro en Suecia, para despois dar paso ao asfalto de Croacia en abril, antes de afrontar tres citas sobre terra, que serán a proba italiana na illa de Sardeña no mes de xuño, o Rally Estonia a finais de xullo e, como final de tempada, unha das probas máis emblemáticas do calendario, o EKO Acrópole Rally de Grecia, que se celebrará na primeira quincena de setembro. Correrán cun Ford Fiesta Rally3, mantido pola estrutura oficial de Ford.