O Goberno aproba máis de 2.500 millóns de euros para bolsas de estudo destinadas a un millón de alumnos

A ministra de Educación, Formación Profesional e Deportes e portavoz do Goberno, Pilar Alegría, anunciou un investimento de 2.544 millóns de euros para o financiamento de bolsas, unha medida que vai beneficiar a un millón de estudantes. Anunciou que poderán solicitarse a partir da vindeira semana. A ministra considera que se trata dunha "cifra histórica" que profunda na aposta pola igualdade de oportunidades.

O Consello de Ministros aprobou ademais este martes un Plan nacional de vixilancia, detección e resposta ante terremotos, erupcións ou tsunamis.

Alegría, explicou que este plan nace impulsado pola última erupción da Palma, "onde o bo funcionamento dos sistemas de vixilancia e alerta permitiu unha óptima xestión da emerxencia, contribuíndo, ademais, a que non se producisen vítimas mortais relacionadas con este fenómeno".

Alegría destacou que 54 entidades académicas, científico-técnicas e administracións colaboraron na elaboración deste documento, cuxo obxectivo "é optimizar recursos humanos, loxísticos e materiais e reforzar a vixilancia".

Proxecto de Lei de Administradores e Compradores de Créditos

O Consello de Ministros deulle tamén o visto bo ao proxecto de Lei de Administradores e Compradores de Créditos, co que quere reforzar a protección dos consumidores financeiros, especialmente os que se atopan en situación de vulnerabilidade económica.

Segundo informou o Ministerio de Economía, o texto, que será remitido ao Congreso dos Deputados para a súa tramitación parlamentaria, transpón a directiva europea sobre a materia e modifica a Lei de Contratos de Crédito ao Consumo.

A nova lei ofrece solucións aos consumidores para afrontar as súas débedas e facilita que as entidades financeiras poidan vender as súas carteiras de créditos, co que poden sanear os seus balances e mellorar a súa solvencia.

O proxecto de lei regula a compravenda de créditos dubidosos conforme unhas regras comúns co resto da Unión Europea (UE) e tamén a actividade de administración de créditos dubidosos, consistente na súa cobranza ou renegociación.

 Este martes, o Consello de Ministros aprobou ademais o real decreto para a creación do Centro de Produción e Residencias Artísticas Tabacalera, o que achega a conversión do emblemático edificio do barrio madrileño de Lavapiés en nova referencia de arte contemporánea a escala nacional.