Rouban dúas veces en tres días nun mesmo negocio de Ferrol

Dous roubos en menos de tres días. Neste caso os feitos sucederon en Ferrol, de madrugada e nun mesmo negocio. 

O local comercial, situado na praza de España, converteuse no centro das falcatruadas dos ladróns. Mariela e John sufriron en menos de tres días dous roubos no seu negocio que abriron hai un ano.

Cando John Malel chegou o sábado, a Policía Nacional xa estaba no lugar dos feitos, pero xa non había rastro do ladrón. "Romperon as pechaduras de abaixo e tamén o sensor pois son portas automáticas" explica, "e ao que soou a alarma deulle tempo de achegarse á caixa, levar o diñeiro e marchar". 

O primeiro roubo sucedeu na madrugada do sábado para o domingo e o último este mesmo martes ás cinco e media da mañá. Desta volta, ao delincuente resultoulle máis sinxelo entrar, pois o motor das portas automáticas seguía roto do primeiro roubo. "Ao seguro non lle deu tempo de arranxalo, entón tan só tivo que forza a pechadura" lamenta John. 

No último roubo o ladrón empregou a lanterna do móbil para evitar que as cámaras de seguridade do local captasen a imaxe. Precisou tan só duns minutos, pois o autor dos feitos dirixiuse nas dúas ocasións directamente á máquina rexistradora moi preto da porta de entrada principal.

Polo de agora, a Policía Nacional segue a investigar os roubos, pero sospeitan que se trata da mesma persoa e están a cercar o círculo nos habituais amigos do alleo da zona.