Rubén Fernández gaña a carreira de cualificación en Suíza

Rubén Fernández gañou a carreira de cualificación do Gran Premio de Suíza de motocrós.

O vigués superou a todos os seus rivais na saída, acadou o hole shot e foi abrindo oco pouco a pouco. Controlou a proba, dominou os seus rivais e gañou con autoridade, con seis segundos de vantaxe sobre o seu compañeiro de equipo Tim Gajser.

Primeira vitoria da temporada e dez puntos máis na clasificación xeral, na que ocupa o sexto posto. O Gran Premio de Suíza verémolo o luns ás dúas e ás cinco na G2.