Rueda insiste: "Nada de conversas bilaterais sobre cuestións de financiamento"

O presidente da Xunta, Alfonso Rueda, reiterou este luns que aínda que el está “desexando ser convocado” a unha reunión con Pedro Sánchez, non participará “en ningún caso” en conversas bilaterais sobre financiamento autonómico.

“Nada de conversas bilaterais sobre cuestións de financiamento”, puxo Rueda como liña vermella para o seu encontro con Sánchez, cita que, lembrou, espera desde hai meses, xa que aínda non o recibiu tras a súa toma de posesión como presidente da Xunta en abril.

Nese encontro levará unha “orde do día extenso” no que haberá tempo para falar de investimentos específicos para Galicia, que é un aspecto “moi diferente de falar do sistema de financiamento”, matizou.

Segundo o presidente da Xunta, o que está “claro” é que o que non lle interesa a Pedro Sánchez é “sentar con todos e dar a cara con todos” porque entón tería que explicar “que acordou con Cataluña”.

Na súa opinión, Sánchez “non é capaz de explicalo” e, por iso, obviou a cuestión na reunión do Comité Federal do PSOE xa que sabe que “se contase realmente a verdade, os movementos de rexeitamento cobrarían aínda máis intensidade”, mesmo dentro das filas socialistas.

“Cando non lle interesa sentar con todos a falar de financiamento é por algo”, axuizou Rueda quen insistiu ademais en que a idea de Sánchez é “seguir profundando na desigualdade para beneficiar a algúns e, desde logo, non a Galicia”.

Deste xeito, volveu a defender que para falar de financiamento autonómico é urxente a convocatoria tanto dunha Conferencia de Presidentes como do Consello de Política Fiscal e Financeira das Comunidades Autónomas.