Rueda reivindica a "freada en seco" que os galegos lles deron a "Sánchez e aos nacionalistas"

O líder do PP de Galicia, Alfonso Rueda, considerou este luns que os resultados electorais demostran que “Galicia deu unha freada en seco a Pedro Sánchez e aos seus socios nacionalistas”.

Xunto ao presidente do PP, Alberto Núñez Feijóo, a dirección dos populares volveu celebrar os resultados que deron a Rueda un apoio maior que ao PSOE e ao BNG xuntos, co que os electores galegos "enviaron unha mensaxe a España moi clara” e é que “nin queremos nin imos admitir chantaxes”.

Sobre os partidos da oposición, BNG e PSdeG, Rueda dixo que non lles pedirá os “cen días de cortesía” que deberían ofrecérselle a calquera goberno.

“Eu non os quero porque imos traballar desde o primeiro día” porque a confianza “gáñase día a día” e, nese camiño, traballarán el e os seus desde o Goberno galego e tamén desde o Parlamento autonómico, en que os populares manteñen a súa maioría absoluta.

Na reunión da xunta directiva, Rueda mostrouse especialmente agradecido co partido por traballar sen descanso para conseguir a súa primeira maioría absoluta, que supón a quinta consecutiva para o PPdeG.

Especial agradecemento dedicou a Núñez Feijóo e destacou o “traballo inmenso” de quen sempre suma en Galicia e prometeu devolver este esforzo para conseguir que “máis pronto que tarde” o expresidente da Xunta se converta no próximo presidente de España.

Fixo referencia tamén Rueda a un dos mantras da esquerda e díxolle que si, que teñen razón, que unha vez máis “a maquinaria electoral do PP” funcionou porque “todos estabamos moi motivados e por iso gañamos”.

 

A "receita" é "concentrar o voto no PP"

O presidente do PP, Alberto Núñez Feijóo, asegurou que Galicia enviou unha mensaxe clara a todos os españois, e é que, "se concentran o voto no PP, freamos ao independentismo e arrinconamos ao sanchismo".

Na súa intervención ante a Xunta Directiva Autonómica do PPdeG este luns, xunto a Alfonso Rueda, que a véspera conseguiu a súa primeira maioría absoluta en Galicia considerou que o PSOE "se estrelou" o 18F. Por eso, "esta é a receita" para España, "concentrar o voto no PP" e "mandaremos á irrelevancia máis absoluta ao sanchismo", recomendou.

Cre que este 18F converteu o que querían que fose un problema para o PP nunha "oportunidade política para España" porque gañou, mentres "o partido de Sánchez esnafrouse e os partidos do Goberno, señora Díaz e demais, non sei onde están, salvo na irrelevancia política máis intensa", concluíu.

Feijóo defendeu a súa implicación total na campaña electoral galega, a pesar de que sabía que se lle ía a xulgar se o seu partido non lograba a maioría absoluta, pero "é moito máis importante que se desgaste o presidente do partido a que se desgaste o partido", polo que afirmou que "volvería facelo sabendo a oportunidade e os riscos que asumía".

O líder do PP mostrouse orgulloso de que o seu partido gañou, unha vez máis, "contra todo e contra todos", tanto á "irresponsabilidade do partido de Sánchez, que se abrazou e encomendou ao BNG, como ante "todas as insidias e a lama" e tamén a quen pretendía que estas eleccións fosen "un plebiscito de liderados".