Putin condena o atentado de Moscova e clama vinganza polas 133 vítimas mortais

O Servizo Federal de Seguridade (FSB) detivo once persoas en relación co atentado na sala de concertos Crocus City Hall preto de Moscova que deixa, segundo as últimas cifras oficiais, 133 vítimas mortais.

Segundo o gobernador da rexión de Moscova, Andréi Vorobiov, localizouse unha vintena de corpos entre os entullos do edificio atacado na cidade de Krasnogorsk, no noroeste da capital rusa.

Entre os detidos atópanse catro terroristas que participaron persoalmente no ataque, segundo lle informou o director do FSB, Alexandr Bórtnikov, ao presidente ruso, Vladimir Putin, indica a axencia TASS.

Entre as persoas falecidas hai polo menos tres menores. Segundo os investigadores rusos, morreron por intoxicación de fume e por ferida de bala.

Nos hospitais de Moscova e da rexión, hai outras 112 persoas feridas no atentado, reivindicado a pasada noite polo Estado Islámico.

Fume no lugar do atentado este sábado (Reuters)

Putin clama vinganza

O presidente ruso, Vladimir Putin, condenou este sábado o "bárbaro" atentado e clamou vinganza contra os que encargaron o devandito ataque, reivindicado polo Estado Islámico.

"Todos os autores, organizadores e os que encargaron este crime recibirán un merecido e inevitable castigo, sexan quen sexan e independentemente de que os enviaran", dixo Putin nunha alocución televisiva.

O mandatario non especulou sobre os autores intelectuais do atentado, aínda que si mencionou que os catro terroristas detidos tentaron fuxir a través da fronteira ucraína.

"Aos terroristas, asasinos e bestas, que non teñen nin poden ter nacionalidade, espéralles un funesto destino: vinganza e esquecemento. Non teñen futuro", comentou.

Lembrou que os rusos coñecen de primeira man o que é a ameaza terrorista, en clara alusión aos atentados perpetrados hai anos pola guerrilla islamita do Cáucaso.

"Agardamos a cooperación con todos os países que comparten sinceramente a nosa dor e están dispostos na práctica para axuntar esforzos na loita contra o inimigo común, o terrorismo internacional en todas as súas manifestacións", dixo.

O líder ruso destacou que as autoridades decidiron reforzar as medidas antiterroristas na capital do país e a adxacente rexión de Moscova, onde tivo lugar o ataque.

O maior atentado dende 2004

Ademais, anunciou que o domingo será día de loito nacional polo maior atentado terrorista sufrido por este país desde a matanza de Beslán, de 2004, que causou máis de 300 mortos.

Putin na alocución televisiva