Rusia golpea Ucraína cun dos ataques máis longos e masivos de toda a guerra

Rusia golpeou este luns 15 dos 24 óblasts (rexións) de Ucraína cun dos ataques de mísiles e drons máis masivos e prolongados de toda a guerra e no que matou a catro persoas noutras tantas rexións do país ademais de causar decenas de feridos e provocar danos en diversas infraestruturas eléctricas.

Segundo dixo o presidente de Ucraína, Volodimir Zelenski, nun vídeo dirixido á nación, Rusia utilizou no ataque ao redor dun centenar de drons kamikaze iranianos Shahed e un número similar de mísiles de distintos tipos.

Zelenski acusou a Rusia de atacar infraestruturas civís, e pediu unha vez máis aos seus aliados occidentais que respondan con “determinación” a esta acción do Kremlin contra Ucraína.

O xefe do Estado insistiu na necesidade en que os seus socios lle permitan facer uso dos mísiles de longo alcance que lle envían para poder golpear obxectivos militares en todo o territorio da Federación de Rusia e non só en certas zonas fronteirizas como ocorre agora.

O principal obxectivo do ataque -que foi lanzado en varias ondas distintas que se estenderon nun prazo de preto de doce horas- foi unha vez máis o sistema enerxético ucraíno.

O Ministerio de Defensa ruso dixo que o ataque buscaba golpear “instalacións críticas de infraestrutura enerxética que garanten o funcionamento do complexo militar-industrial de Ucraína”.

Rusia tamén informou este venres da derriba de drons ucraínos nas rexións de Kursk e Sarátov.

Nesta última rexión, onde se atopa o aeródromo militar de Enguels, catro civís resultaron feridos no ataque.

O de hoxe é o noveno ataque masivo ruso contra o sistema eléctrico ucraíno desde o pasado 22 de marzo. Ucraína perdeu nestes ataques boa parte da súa capacidade de xeración, o que obrigou ás autoridades a racionar a subministración con apagamentos programados de ata media xornada durante a primeira parte do verán.

Combates na rexión rusa de Kursk

Antes deste ataque o presidente de Ucraína, Volodimir Zelenski, anunciara no seu discurso á nación de este domingo á noite que o Exército ucraíno tomara o control doutras dúas localidades na rexión rusa de Kursk, onde as forzas de Kíiv ocupan decenas de aldeas e vilas tras cruzar a fronteira a principios de agosto.

“Acabo de falar co comandante en xefe (Oleksandr) Sirski. Estamos a avanzar na rexión de Kursk, dun a dous quilómetros. Tomamos o control de dúas localidades máis. Hai operacións en marcha noutra localidade”, dixo Zelenski na súa alocución.

O xefe do Estado ucraíno explicou así mesmo que as súas tropas seguen facendo prisioneiros entre os soldados rusos na rexión de Kursk. “Estamos a encher o ‘fondo de intercambios’”, dixo Zelenski en referencia aos trocos de prisioneiros de guerra que levan a cabo regularmente entre ambos os bandos.

Ucraína e Rusia intercambiaron esta semana 115 soldados de cada bando que estaban baixo cativerio inimigo.