Rusia lanza o “maior ataque recente contra a industria enerxética” de Ucraína

O ataque ruso desta madrugada con preto de 90 mísiles e máis de 60 drons contra diversos óblasts de Ucraína é o máis grande lanzado recentemente por Rusia contra o sector enerxético ucraíno, segundo declarou o ministro de Enerxía do país atacado, German Galushchenko, nas súas redes sociais.

Segundo o ministro de Enerxía ucraíno, "o obxectivo ruso é colapsar o sistema enerxético do país”

“O inimigo está a levar a cabo o maior ataque recente contra a industria enerxética ucraína”, escribiu GalushZAPORIchenko á primeira hora da mañá do venres. O ministro agregou que “o obxectivo” ruso “non é só danar, senón tentar provocar de novo un colapso a gran escala do sistema enerxético do país”.

Galushchenko facía referencia á campaña de ataques masivos rusos contra as centrais eléctricas e térmicas ucraínas que a partir de novembro de 2022 deixou sen electricidade durante semanas a millóns de ucraínos.

“Desgraciadamente, houbo impactos en infraestruturas de xeración e en sistemas de transmisión e distribución de varias rexións”, dixo o ministro, que agregou que os proxectís rusos cortaron unha das liñas que dan subministración eléctrica á central nuclear de Zaporiyia, a máis grande de Europa e baixo control das forzas de ocupación rusas.

Galushchenko informou de cortes de electricidade en varias rexións do país como consecuencia do ataque. Os traballadores do sector eléctrico, explicou, traballan para restablecer a subministración o máis rápido posible. Unha das zonas afectadas é a cidade nororiental de Járkov, cuxas autoridades informaron de que a urbe quedou sen luz.

Today ru launched the biggest attack on🇺🇦energy sector in recent times. There were damaged power generation facilities,transmission and distribution systems.
The aim is not just to cause damage, but to cause a failure of all energy system.Terrorussia can’t break us!We’ll stand🇺🇦 pic.twitter.com/xQCCUJiQ0N

— German Galushchenko (@G_Galushchenko) March 22, 2024

Zelenski indica que os proxectís ían dirixidos contra centrais eléctricas, liñas de transmisión e contra unha central hidroeléctrica

Nunha mensaxe sobre o ataque de onte á noite, o presidente Volodímir Zelenski revelara que os proxectís ían dirixidos contra centrais eléctricas, liñas de transmisión e contra unha central hidroeléctrica. Zelenski pedira o xoves os seus aliados máis sistemas de defensa antiaérea para que Ucraína deixe de ser vulnerable aos ataques aéreos rusos.

A empresa pública a cargo desta última infraestrutura confirmou que un dos proxectís impactou na maior central hidroeléctrica da rexión de Zaporijia, no sueste de Ucraína.

Segundo a empresa, Rusia busca “crear un novo desastre ecolóxico” golpeando as infraestruturas da central e a presa da que se alimenta con auga. 

Kiev e o resto de Ucraína

A onda de proxectís rusos desta madrugada é unha das máis densas dos últimos meses e chega un día despois de que Rusia disparara contra a cidade de Kiev máis dunha trintena de mísiles que foron derrubados na súa totalidade polas defensas aéreas que protexen a capital.

Reivindicando a eficacia dos sistemas occidentais despregados en Kiev, o presidente Volodímir Zelenski dedicou case todas as súas intervencións públicas do xoves para urxir aos seus aliados a que envíen máis baterías antiaéreas Patriot e outras tecnoloxías similares para que Ucraína deixe de estar a mercede dos ataques rusos tamén noutras partes do territorio.

Vinte e catro horas despois do pleno das defensas antiaéreas ucraínas en Kiev, un novo ataque aéreo ruso, está vez a escala nacional, saldábase cun desenlace moi distinto que retrotrae a millóns de ucraínos ao outono de 2022, cando boa parte do país viviu sen electricidade durante semanas pola campaña militar rusa contra as centrais eléctricas de Ucraína.

“O custo dos atrasos”

“É importante entender o custo dos atrasos e as decisións aprazadas”, dixo Zelenski sobre o ataque do venres insistindo na necesidade de recibir con máis rapidez axuda defensiva dos seus socios.

O presidente ucraíno fixo alusión aos sistemas antimísiles estadounidenses que onte derrubaron un mísil hipersónico ruso Kinzhal como os sete que este venres si conseguiron alcanzar os seus obxectivos noutros lugares peor protexidos de Ucraína.

“Os sistemas (antiaéreos) Patriot deben protexer Járkov e Zaporiyia, necesítase defensa aérea para protexer a xente, as infraestruturas, as casas e as presas”, sinalou Zelenski mencionando dúas das grandes cidades ucraínas máis castigadas por Rusia.

Polo menos cinco civís ucraínos perderon a vida no ataque deste venres, tres na rexión de Zaporiyia e outras dúas en Jmelnitski (Ucraína occidental).

“Os aliados saben exactamente que se necesita. E pódennolo ofrecer. Estas solucións son necesarias. A vida debe ser protexida destes inhumanos de Moscova”, dixo Zelenski ao termo da súa mensaxe de condena ao lanzamento masivo de drons e mísiles.