Rusia permítelle a Ucraína exportar cereais para evitar un episodio de fame global

No medio dunha crise alimentaria que comezou a sacudir o mapa político mundial, Kíiv e Mosova asinaron este venres en Istambul un acordo que permitirá a exportación de cereais ucraínos no medio da guerra e facilitará a venda de fertilizantes rusos.

O acordo permitirá exportar desde tres portos ucraínos -Odesa, Pivdennyi e Chornomorsk- ao redor de 22 millóns de toneladas de trigo, millo e outros cereais almacenados en silos, que non se podían vender por mor do bloqueo naval ruso.

O ministro de Defensa de Rusia, Serguei Shoigu, e o titular de Infraestruturas de Ucraína, Oleksandr Kubrakov, asinaron o pacto en Istambul, aínda que nunca coincidiron na mesa ao mesmo tempo.

A cerimonia para establecer corredores marítimos seguros estivo presidida polo secretario xeral da Organización das Nacións Unidas, Antonio Guterres, e o mandatario de Turquía, Recep Tayyip Erdogan.

Turquía, membro da OTAN, mantén boas relacións tanto con Moscova como con Kiív e ademais aplica o tratado internacional que regula a navegación polo Estreito dos Dardanelos e o Bósforo, a vía de auga que comunica o Mediterráneo co Mar Negro.

A partir deste pacto créase en Istambul un Centro de Coordinación Conxunto (JCC, nas súas siglas en inglés) que verificará a aplicación do acordo, que prevé inspeccións por parte da ONU e de Turquía dos barcos que entren e saian do Mar Negro.