Rusia planea tomar o sur de Ucraína e unilo coa rexión prorrusa de Moldava

Rusia admitiu este venres por primeira vez que quere crear un corredor terrestre desde o Donbás á anexionada península de Crimea e revelou que o seu plan bélico non para aí, senón que inclúe tomar o sur para unilo coa rexión separatista prorrusa de Transnistria, en Moldava, segundo un alto mando militar.

"Desde o iniciou da segunda fase da operación especial, que comezou literalmente hai dous días, unha das tarefas do Exército ruso é establecer o pleno control sobre o Donbás e o sur de Ucraína", sinalou o comandante en funcións do Distrito Militar Central de Rusia, xeral maior Rustam Minnekéyev. 

O Kremlin non confirmou nin desmentiu as palabras do xeneral maior. Ata o de agora tanto Putin como o seu ministro de Defensa, Serguéi Shoigú, só falaran de que o obxectivo "principal" da campaña militar rusa nesta segunda fase era a "liberación completa do Donbás", formado polas rexións de Donetsk e Lughansk, cuxa independencia recoñeceron antes de lanzar a "chamada operación militar especial".

O Goberno de Ucraína denunciou inmediatamente o "imperialismo" ruso e destacou que Rusia revelou as verdadeiras intencións da súa ofensiva militar, que non é, como anunciou inicialmente a "desnazificación" do país veciño.

"Deixaron de ocultalo. Hoxe, o comando de saqueadores, violadores e asasinos rusos recoñeceu que o obxectivo da 'segunda fase' da guerra non é unha vitoria sobre os míticos nazis, senón simplemente a ocupación do leste e sur de Ucraína", sinalou o Ministerio de Defensa de Ucraína.

O control total sobre o leste e sur de Ucraína "permitirá establecer un corredor terrestre a Crimea e gañar influencia sobre instalacións vitais da economía ucraína e os portos do mar Negro a través dos cales se envían os produtos agrícolas e metalúrxicos a outros países", segundo o xeneral maior ruso.

Pero é máis, afirmou Minnekéyev, segundo a axencia oficial TASS, "o control sobre o sur de Ucraína é ademais unha vía de acceder a Transnistria onde tamén se constatan os feitos de discriminación contra os residentes de fala rusa".

Transnistria, territorio de apenas medio millón de habitantes, na súa maioría eslavos (rusos e ucraínos), rompeu os lazos con Moldavia tras un conflito armado en 1992-1993 en que contou con axuda rusa.

En virtude dun acordo para a solución pacífica do conflito, Rusia emprazou máis de 2.000 efectivos para garantir a paz. O pasado 5 de marzo, o territorio separatista pediu que se recoñeza a súa independencia.