Sabotaxe masiva á rede ferroviaria francesa na xornada inaugural dos Xogos Olímpicos

Francia sufriu este venres un ataque organizado contra a rede de trens de alta velocidade ao redor de París que creou graves problemas no tráfico e ten lugar o día da cerimonia de inauguración dos Xogos Olímpicos.

A presidenta da rexión de París, Valérie Pécresse, denunciou "un intento de desestabilización de Francia" nun día clave para o país, como é a cerimonia de inauguración dos XX. OO.

Os ataques consistiron en incendios provocados de forma coordinada en condutos de cables de alimentación da sinalización e de comunicacións.

A empresa nacional francesa de ferrocarril (SNCF) comunicou "un ataque masivo" destinado a paralizar a súa rede de trens de alta velocidade (TGV) que afecta a tres das catro liñas de París, con aproximadamente 800.000 viaxeiros afectados nos próximos días.

Os problemas de circulación van estenderse polo menos durante toda a fin de semana e prodúcense non só no día da cerimonia de inauguración dos Xogos Olímpicos de París, senón tamén nuns días especiais para a saída e entrada de vacacións.

As liñas afectadas, con atrasos e suspensións, son as dos eixos norte (que inclúen tamén os TGV a Londres, Bruxelas, Ámsterdam e Alemaña), oeste (Bretaña, Bordeus) e leste (Estrasburgo, Frankfurt).

As estacións do Norte, do Leste e de Montparnasse quedaron especialmente afectadas, con miles de viaxeiros atrancados desde a mañá.

O cuarto eixo de TGV de París, o sueste (Lión, Marsella), salvouse porque un intento de sabotaxe contra a liña "foi frustrado", detallou a SNCF.

Pécresse explicou que nesa cuarta liña os vixiantes puxeron en fuga aos sabotadores.

A presidenta rexional detallou que hai 250.000 viaxeiros afectados só hoxe, polo que pediu non acudir ás estacións ferroviarias a non ser que reciban mensaxes da SNCF.

A elección dos puntos onde tiveron lugar os incendios fai pensar que os autores, ademais de estar coordinados, teñen coñecementos técnicos.

O ministro de Transportes, Patrice Vergriete, cualificou os feitos como "un acto criminal escandaloso" e resaltou a "coordinación" dos incendios, que foron aproximadamente "á mesma hora", ao redor das 04:00 de hoxe (02:00 GMT), con artefectos incendiarios e con autores que fuxiron en camionetas.

O presidente de SNCF, Jean Pierre Farandou, considerou as sabotaxes como "un ataque a Francia e aos franceses", nunha comparecencia conxunta á prensa xunto co ministro.

Farandou detallou que o traballo de reparación é moi delicado, xa que os incendios afectaron a canalizacións con ata 500 cables eléctricos e de fibra óptica.

"Hai que reparar cable por cable, é un traballo case de ourivaría", explicou un alto responsable da empresa nesa comparecencia.

O prefecto de París, Laurent Nunez, anunciou pola súa banda o envío de reforzos policiais ás principais estacións da capital para garantir a seguridade dos pasaxeiros e das instalacións