Sánchez cre que a vitoria de Illa abre "un tempo novo" en Cataluña

Para Pedro Sánchez, os resultados en Cataluña demostran que tiña "razón" ao impulsar a amnistía para os condenados polo procés, xa que "a superación de conflitos pasados faise apostando polo perdón e pola xenerosidade", dixo este xoves.

Cre o presidente do Goberno que a vitoria de Salvador Illa "pecha unha década de división e resentimento na sociedade catalá e vai abrir un tempo novo".

Pero o candidato do PSC sabe que non vai ser doado facerse coa Generalitat.  Recoñece a "relevancia" de ERC e "respecta" os seus debates internos. Nunha entrevista na Cadena Ser, Salvador Illa cualificou de "moi digno" o comportamento do presidente saínte Pere Aragonès, co que falou en privado.

Pere Aragonès foi o primeiro en caer tras a desfeita de ERC nas urnas. Tras el, Oriol Junqueras tamé anunciou que deixará a presidencia do partido despois das europeas, aínda que aspira a volver no congreso que celebrarán en novembro. "A miña vontade é axudar tanto como sexa posible, sempre que teña o aval da militancia", afirmou en conferencia de prensa.

Quen tamén tenta a ERC é Carles Puigdemont, que insiste en presentarse á investidura. O líder de Junts cre que o seu partido ten "máis opcións" de gobernar en minoría que o PSC.

O PP cre que Puigdemont lle "lanzou un órdago ao PSOE, esixíndolle que deixe caer a Illa e que lle entregue o goberno a Junts", en palabras do seu voceiro no Congreso. Miguel Tellado insta a Pedro Sánchez a que responda a pregunta, a que non a evite e que non espere a contestala ata despois das eleccións europeas.

Para o líder do PSOE, Pedro Sánchez resulta "esperpéntico escoitar os supostos defensores da unidade de España botar en falta nas súas declaracións o procés catalán".