Sánchez presume de que España medra "sen burbullas nin pelotazos"

O presidente do Goberno, Pedro Sánchez, destacou este sábado que o liderado español en crecemento entre as principais economías do mundo estea a lograrse "sen burbullas nin pelotazos", en contraste coas propostas do PP en materia de vivenda, que ofrece de novo a súa receita "de sempre".

O tamén secretario xeral do PSOE expresouno así en Toledo, na apertura do decimoterceiro congreso rexional dos socialistas de Castela-A Mancha, en presenza do seu líder desde hai trece anos, Emiliano García-Page. Page foi reelixido para catro anos máis como único candidato, sen necesidade de primarias. Entre os presentes, os seus antecesores José Bono e José María Barreda, e a ministra de Vivenda, Isabel Rodríguez.

Sánchez centrou o seu discurso en materia económica e comparou "o fracaso do neoliberalismo" a nivel mundial coa demostración de que "a fórmula socialdemócrata en España é de éxito", como mostran os últimos datos de organizacións internacionais.

Eloxios a García Page

O secretario xeral do PSOE, Pedro Sánchez, felicitou a Emiliano García Page pola súa reelección como máximo responsable do Partido Socialista en Castela-A Mancha e ofreceu o apoio de todo o partido e do goberno que preside.

Sánchez asegurou que Page estivo á altura na xestión da dina, que tamén afectou as provincias de Cuenca e Albacete.

"Os socialistas non aplaudimos nin avalamos a incompetencia", sinalou Sánchez ante o barón máis crítico coa súa xestión, e aproveitou para cargar contra o Partido Popular, ao que ve "sumido na miseria moral e a incompetencia política".