Sánchez inicia a rolda cos presidentes autónomicos en pleno debate sobre o sistema de financiamento

O lehendakari vasco non quixo perder nin un minuto da súa reunión co presidente do Goberno falando sobre o financiamento das outras comunidades autónomas. "Non vou meterme en casa allea porque non me gusta que ninguén se meta na casa das vascas e dos vascos", dixo Imanol Pradales na conferencia de prensa posterior ao encontro.

Si falaron de acelerar o traspaso de competencias a Euskadi e da estabilidade do Goberno de Sánchez. Viu o presidente con "ganas dunha lexislatura longa", e Pradales ofreceulle apoio asegurándolle que "Euskadi vai xogar a favor da estabilidade do Estado".

O PNV apoiará o teito de gasto a próxima semana no Congreso, e o Goberno aproveita para mandarlle unha mensaxe ao PP: iso tamén é financiamento autonómico. Para Ángel Víctor Torres, "financiamento tamén é que non perdan miles de millóns as comunidades autónomas e os concellos por votar en contra da senda de estabilidade a próxima semana". O ministro de Política Territorial  fixo un chamamento "á responsabilidade e a non votar non para ver se o Goberno ten unha nova derrota parlamentaria".

Pero o PP non desvía o argumento. Pide unha reforma do financiamento consensuada entre todos, multilaterial, e así o van defender todos os seus presidentes autonómicos.

Elías Bendodo, vicesecretario do PP, asegurou que "os presidentes autonómicos do PP que hoxe inician esa rolda co presidente do Goberno non van aceptar nin Españas multinivel nin pactos do embudo: o ancho para o independentismo e o estreito para o resto das comunidades autónomas".

A esa fronte de presidentes populares podería unirse algún socialista, como o de Castela-A Mancha. Emiliano García-Page, crítico co concerto catalán pactado con ERC, reunirase con Pedro Sánchez na Moncloa o próximo 4 de outubro.