Detidos cando introducían 121 quilos de coca oculta entre aguacates no aeroporto de Madrid
Detidos cando introducían 121 quilos de coca oculta entre aguacates no aeroporto de Madrid
A mesma banda é a responsable doutro cargamento de 109 quilos de cocaína introducido a través do porto de Róterdam e cuxo destino final era tamén Madrid
A Garda Civil e a Policía Nacional, nunha operación conxunta, detiveron seis membros dunha organización criminal que supostamente introduciu 121 quilos de cocaína oculta entre aguacates polo aeroporto Adolfo Suárez de Madrid.
A mesma banda é supostamente responsable doutros alixos introducidos por vía marítima a través de portos portugueses e neerlandeses.
Entre eles destaca un cargamento de 109 quilos de cocaína introducido a través do porto de Róterdam (Países Baixos), e cuxo destino final era a capital española, polo que a cantidade de estupefacientes intervidos ascende a 230 quilos, informaron ambos os corpos este venres.
A bautizada como operación Kindgreek arrincou o pasado febreiro, cando os investigadores detectaron que unha empresa establecida na localidade madrileña de Valdemoro estaba a realizar importacións de froita sospeitosas desde América do Sur, principalmente aguacates.
Avanzadas as pescudas, lograron identificar o titular da compañía e os seus traballadores, algúns de orixe española e outros dominicanos.
Intensificaron as vixilancias sobre os importadores e descubriron que, tras cada envío aéreo de mercadoría, esta era gardada nun almacén situado no barrio madrileño de Vallecas. Aí separaban a droga da froita, que distribuían en diversos establecementos.
O pasado venres os axentes interceptaron un dos envíos que ía recibir a empresa investigada, no que declararan dúas toneladas de aguacates entre os cales se interviñeron 121 quilos de cocaína.
O envío, coa froita pero sen a droga, chegou ata o almacén, onde pouco despois chegaron catro homes con intención recuperar a cocaína. Nese momento, os investigadores, que estaban a vixiar a zona, procederon á súa detención.
Outras dúas persoas foron posteriormente arrestadas no aeroporto, entre elas a administradora da empresa investigada, quen trataba de abandonar o país.
O Xulgado de Instrución número 47 de Madrid, que coa colaboración da Fiscalía Antidroga coordinou as pescudas, decretou o ingreso en prisión provisional dos principais investigados.