Sargadelos comunica tres despedimentos na fábrica de Cervo

Sargadelos comunicou o despedimento de tres traballadores na fábrica de Cervo, sobre a que pesa un expediente laboral aberto pola Inspección de Traballo por deficiencias en materia de seguridade.

O responsable comarcal da CIG na Mariña, Xorxe Caldeiro, informou de que o sindicato xa puxo en coñecemento da Inspección de Traballo a existencia de varios “despedimentos” na factoría de Cervo.

Caldeiro sinalaba que, polo menos de momento, por parte do sindicato descoñecíanse “cantos despedimentos” levara a cabo a empresa, aínda que tiñan constancia de "polo menos dúas persoas”, que finalmente son tres.

“Estamos sorprendidos, aínda que é unha sorpresa relativa, tratándose de quen se trata”, asegurou Caldeiro en referencia ao administrador único de Sargadelos, Segismundo García.

O expediente da Inspección de Traballo foi o que provocou unha reacción por parte de Segismundo García, en forma de pulso, ao asegurar que se ve "incapaz" de cumprir con "toda a normativa" para garantir a saúde dos seus empregados e instar a autoridade laboral a que sexa ela a que "clausure" a planta.

Dúas traballadoras da emblemática firma de cerámica galega desenvolveron silicose e unha inspectora de Traballo detectou ata 36 deficiencias, que reclama emendar.

Mantemento da actividade e os dereitos laborais

A Xunta advirte a Sargadelos que a súa colaboración para implementar con "flexibilidade" as medidas de seguridade na fábrica de Cervo irá "sempre da man" do mantemento da actividade e dos dereitos laborais.

Neste contexto, tras os despedimentos que acaban de transcender, a Xunta reiteran o seu "máximo compromiso co mantemento da actividade e o emprego" en Sargadelos, o principal "obxectivo" xunto coa "protección da saúde e a seguridade laboral" na planta de Cervo.

"Calquera despedimento é unha mala noticia", sinalan fontes da Consellería de Emprego, que insisten en que o departamento que dirixe José González está "ao dispor da empresa e os axentes sociais".

O empresario, Segismundo García, administrador único de Sargadelos, ten seis meses desde o momento da notificación para cumprir cos requirimentos, aínda que o prazo será a contar desde o momento en que teña permiso do departamento de Patrimonio da Xunta para aquelas actuacións que afecten o edificio, declarado como ben de interese cultural (BIC).

A comezos de mes García mantivo pechadas as instalacións para o persoal de produción durante catro días, xornadas que os empregados pasaron ás portas da factoría. Aseguraba que o facía para preservar a súa saúde e ante a mencionada "incapacidade" para aplicar a normativa en materia de seguridade laboral.

Esa situación terminou cun acordo coa Xunta, co conselleiro de Emprego, José González, que implicaba a realización dun estudo sobre melloras, aínda que non se precisaron datas nin actuacións concretas, nin se haberá algunha partida para a compañía.

Durante o tempo que durou o peche, literal, posto que o dono da empresa non iniciou ningún expediente de regulación nin iniciou os trámites para pechar o negocio, o dono expuxo ao persoal de produción asinar un documento segundo o cal accedía á planta baixo a súa responsabilidade ou adiantar parte das súas vacacións. Unha parte reducida aceptou unha ou outra alternativa, e a maioría permaneceu fóra.

Finalmente, a normalidade volveu á fábrica, ata que este venres foi notificado máis dun despedimento. Unha factoría que, tras anos de conflitividade, despedimentos e acusacións a Segismundo García de "persecución sindical", carece de representación sindical, aínda que responsables de CC.OO., UXT e CIG asesoran aos traballadores desde que estalou o conflito.