Satisfacción no concello de Lugo por non ter que pagar 15 millóns de euros polo Garañón
Satisfacción no concello de Lugo por non ter que pagar 15 millóns de euros polo Garañón
O TSXG ratifica a sentenza que lle denegaba ao promotor das polémicas torres do Garañón a reclamación dunha indemnización ao Concello
![](https://img-g24-crtvg.flumotion.com/prog24/2022/20220104/parcelagaranon.png)
O goberno local de Lugo expresou a súa satisfacción polo feito de que o Tribunal Superior de Xustiza de Galicia ratificase a sentenza emitida polo Xulgado do Contencioso-Administrativo número 2 da capital lucense, que lle denegaba ao promotor das polémicas torres do Garañón a reclamación dunha indemnización ao Concello de 15,4 millóns de euros.
“A sentenza é unha decisión esperada, pero non por iso é menos satisfactoria”, recoñeceu a alcaldesa de Lugo Paula Alvarellos en declaracións aos medios de comunicación.
De feito, precisou que ao renunciar o promotor para seguir co preito, esa resolución do TSXG, que avala a decisión que no seu día tomou o Contencioso Administrativo de Lugo, dá por pechada a vía xudicial.
O Concello de Lugo “non terá que facer fronte a ningunha indemnización” pola derriba das torres do Garañón, “como esperabamos”, apostilou a alcaldesa.
Nese sentido, precisou que o goberno local de Lugo segue “coa súa folla de ruta” para realizar unha “modificación puntual do PXOM” e converter a parcela do Garañón nun espazo “verde” de “uso público”.