Electricidade galega para Galicia, por Venancio Salcines

Os recursos de Galicia teñen que ser motor do desenvolvemento de Galicia. Isto que parece unha frase feita, pero que nunca chega a acadarse, parece que por fin poderá ser unha realidade. A patronal, ante o malestar da industria da enerxía renovable, que non quere compromisos co territorio, toma posición co obxectivo do goberno galego de que unha parte da enerxía xerada en Galicia acabe no tecido empresarial galego.

Esa posición é o lóxico, porque a patronal ten que estar coa maioría das empresas de Galicia e coas políticas que favorecen a maioría do ecosistema empresarial. O que non é tan lóxico é que o Tribunal Superior de Xustiza acorde un día si e outro tamén suspensións cautelares dos parques eólicos. Leva xa 151 autos de suspensión de autorización administrativa previa e paralizadas cautelarmente 62.

É obvio que o activismo político ten un pé dentro do movemento ecoloxista e este utiliza a vía xudicial como estratexia. O que nos está levando á perda de multitude de oportunidades, a diferenza doutras autonomías, onde o desenvolvemento da súa enerxía renovable lles permite captar miles de millóns en investimentos como, por exemplo, Aragón.