Colapsa totalmente o sistema eléctrico cubano

O sistema eléctrico cubano colapsou totalmente este venres, informou en redes sociais o Ministerio de Enerxía e Minas (Minem).

"Ás 11:07 desta mañá, debido ás condicións en que está a operar o (sistema eléctrico nacional) SEN, produciuse a súa desconexión total". O Ministerio engadiu que se traballa no seu restablecemento.

O colapso do sistema produciuse a raíz dun problema na central termoeléctrica de Guiteras, unha das maiores do país, que obrigou aos técnicos a sacala do sistema, segundo o ministerio.

Esta termoeléctrica, segundo informou este xoves a propia Unión Eléctrica (UNE), precisaba xa un mantemento dalgúns días despois de estar operativa todo o verán (e contar con máis de catro décadas de actividade).

En setembro de 2022 produciuse unha situación similar de "cero produción" tras o paso do furacán Ian con categoría tres polo extremo occidental da illa. Isto provocou un desaxuste de graves dimensións e deixou ás escuras a todo o país. A recuperación levou días.

Cuba atópase inmersa nunha grave crise enerxética polo déficit de combustible, froito da falta de divisas para importalo. O país tamén ten un problema coa obsolescencia das súas sete centrais termoeléctricas, de factura soviética e con falta de investimentos e mantementos.

Para este venres a UNE prevía que, no momento de máxima demanda, se producise un apagamento que afectaría de forma simultánea o 49% do país.

Trátase da segunda maior porcentaxe de afectación prevista no que vai de ano, despois de que este xoves se marcase o máximo de preto dun 51 %. No principio do ano xa se rexistraron taxas superiores ao 40 %.

O primeiro ministro cubano, Manuel Marrero, compareceu este xoves en televisión para falar da actual "emerxencia nacional" e anunciou medidas como a paralización de toda actividade laboral estatal non indispensable.

Os frecuentes apagamentos danan a economía cubana -que en 2023 se contraeu un 1,9 % e aínda se atopa por baixo dos niveis de 2019.

Os frecuentes apagamentos foron ademais catalizadores das últimas protestas antigobernamentais de certa entidade na illa, incluídas as do 11 de xullo de 2021 -as maiores en décadas-, e as do pasado 17 de marzo en Santiago de Cuba e outras localidades.