Cuba vive un novo apagamento total cando tentaba recuperarse do colapso do venres

Cuba sufriu un segundo apagamento este sábado, apenas unhas horas despois de que as autoridades anunciaran que se estaba recuperando pouco a pouco a electricidade.
O servizo tardará días en restablecerse porque a industria eléctrica cubana está moi deteriorada e o goberno non ten fondos para reparala.

A maioría dos 10 millóns de residentes do país pasaron a noite do venres ao sábado sen electricidade e no medio de fogueiras e candeas. Con todo, un grupo de veciños 
atopou algo positivo na situación. "Para que nos imos desgustar, hai que compartir; mira, nunca falara con esta veciña e hoxe teño a oportunidade".

Na madrugada do sábado algunhas zonas da Habana, incluídos varios hospitais, viron acenderse as luces durante un momento antes de volver apagarse e producirse outra vez a desconexión total. É o segundo apagamento en dous días tras a avaría rexistrada na central de Guiteras, unha das principais plantas xeradoras do sector.

"E agora quedamos sen Internet tamén e no restaurante non había comida porque faltaba enerxía".

O presidente do país asegura que os técnicos van traballar sen descanso para restablecer o servizo. Pero probablemente tardarán días porque a industria eléctrica cubana está moi deteriorada.

En 40 anos de uso non houbo investimentos nin traballos de mantemento. E falta combustible e divisas para mercalo. O país produce pouco e os socios que o subministraban, como Venezuela, e tamén Moscova e México, reduciron as súas entregas.