Segue a busca do octoxenario desaparecido en Pontevea
Segue a busca do octoxenario desaparecido en Pontevea
Este mércores farase unha semana dende que faltou da casa
![](https://img-g24-crtvg.flumotion.com/prog24/2023/20231226/busca_pontevea.png)
En Teo, continúan buscando o octoxenario desaparecido o pasado mércores. As tarefas de busca seguen a centrarse no río Ulla, ao seu paso por Pontevea, zona na que se atoparan algunhas pertenzas do home.
O home deixou a súa chaqueta, os seus zapatos e as súas lentes xunto a unha nota escrita por el mesmo, co seu nome e apelidos na ponte medieval de Pontevea.
É por iso que o operativo de busca se centra neste punto, río abaixo, ata a zona do Xirimbao.
Un dispositivo no que traballa a Garda Civil por terra e tamén os GEAS, o Grupo Especial de Actividades Subacuáticas. Amais tamén está a Policía Local e o servizo municipal de emerxencias de Teo. Pero o certo é que as tarefas están a ser moi complicadas estes días porque o río Ulla baixa con moito caudal. Con todo, este martes fixérono descender un chisco ao pechar as portas do encoro.
Uns traballos que están seguindo moi de preto a familia deste home, xa que este mércores fará unha semana cando se viu por última vez a este veciño de Teo de 78 anos, xusto nesta zona de Pontevea, pero seis días despois de momento o operativo non está dando resultados".