Arden máis de 300 hectáreas en catro incendios que seguen sen control en Galicia
Arden máis de 300 hectáreas en catro incendios que seguen sen control en Galicia
Medio Rural dá por estabilizado o incendio declarado na parroquia de Pentes, na Gudiña, que calcinou 200 hectáreas; o de Barxas queimou 90 hectáreas
Os servizos de extinción conseguiron estabilizar o lume de Cerdedo-Cotobade, que afectou a 20 hectáreas, e traballan agora noutro foco en Chandrexa de Queixa
Os dous incendios que afectan o municipio ourensán da Gudiña xa chegan ás 290 hectáreas, segundo a última actualización da Consellería do Medio Rural.
En concreto, o lume de Pentes, que alcanza as 200 hectáreas, iniciouse ás 13:18 horas do pasado luns. Está estabilizado desde a medianoite do luns ao martes e na súa extinción traballan oito avións, dez helicópteros, once motobombas, quince axentes, vinte e catro brigadas, catro pas e tres técnicos.
O outro lume, na parroquia de Barxa, está activo desde pouco despois da medianoite deste martes e afecta a unha superficie provisional de 90 hectáreas. Traballan cinco avións, sete helicópteros, dez brigadas e cinco motobombas, entre outros. Tamén colaboran medios terrestres procedentes de Portugal.
Ademais, a Xunta informa de que quedou estabilizado o lume que calcinou unhas 20 hectáreas na parroquia de Agusantas, situada no concello de Cerdedo-Cotobade (Pontevedra). Mobilizáronse oito axentes, quince brigadas, dez motobombas, dúas pas, catro técnicos, cinco helicópteros e seis avións.
A esta hora permanece activo outro foco no concello ourensán de Chandrexa de Queixa. Leva queimadas algo máis de 20 hectáreas na parroquia de Requeixo.
A Consellería dá por extinguido o incendio declarado na parroquia de Trez, en Laza, que afectou a unha superficie de 68 hectáreas, e o de Mourentán, en Arbo, que queimou 22,7 hectáreas de monte arborado e raso.
