Separatistas prorrusos denuncian ataques para frustrar os referendos

As autoridades prorrusas aseguran que Kíiv está intensificando as súas ofensivas nos territorios separatistas do leste de Ucraína para frustar os referendos de anexión a Rusia. Polo menos dúas persoas morrían nas últimas horas nun ataque con mísiles contra un hotel de Khersón. Tamén denunciaron ataques contra o centro de Donetsk. 

As votacións nesta cidade, e tamén en Lugansk, en Khersón e en Zaporijia, ás que Ucraína e parte da comunidade internacional negan toda lexitimidade, rematan mañá e dáse por feito que gañará o si. 

Mentres, nas principais cidades rusas, en Moscova ou San Petersburgo, continúan as protestas contra a mobilización militar ordenada por Putin, sobre todo contra a arbitrariedade á hora de ordenar os recrutamentos. Desde o mércores, xa se produciron máis de dúas mil detencións. En Sibeira, unha protesta de mulleres terminou con varias detidas. 

Ao mesmo tempo, continúa o éxodo de homes en idade militar polas fronteiras terrestres. Así estaba onte o paso fronteirizo con Mongolia, por onde cruzaron xa nos últimos catro días máis de tres mil rusos. 

Moito movemento tamén na fronteira con Xeorxia. Contan que non queren ir á guerra, que non queren participar no plan de Putin. Saben a que se enfrontan desertando. O presidente firmaba esta fin de semana o aumento de penas por deserción e rendición. 

A eles, aos cidadáns rusos, dirixiu esta noite o seu discurso o presidente ucraíno Volodimir Zelenski. Chámalles camaradas e dilles que teñen varias opcións: evitar ser recrutados, fuxir ou renderse aos ucraínos, porque dixo que quen os mandan á guerra saben que van morrer. E asegurou que cantos máis cidadáns da Federación rusa intenten protexer as súas propias vidas, antes rematará a guerra contra o pobo ucraíno.