Sánchez cualifica a Feijóo de "colosal engano" e este fala dun Goberno "dividido" que "saquea os traballadores"

O presidente do Goberno, Pedro Sánchez, cualificou este mércores a Alberto Núñez Feijóo de "colosal engano" para a política española despois de que o líder do PP lle reprochara a división entre os socios do Executivo pola tributación do salario mínimo.

O presidente do PP acusou o xefe do executivo de "saquear os traballadores" e instouno a aclarar se a vicepresidenta segunda, Yolanda Díaz, sabía que os perceptores do salario mínimo ían pagar IRPF ou mentiu cando dixo que o soubo pola prensa. "Nunca un Goberno foi tan inútil, tan caro e tan dividido coma o seu", espetoulle.

Sánchez contraatacou advertindo de que, se se fala de retencións, "aos sobresoldos de Bárcenas á dirección o Partido Popular seguro que non se lles retiña IRPF".

O presidente indicou que España "lidera o crecemento económico en Europa" e lembrou que, desde que chegou ao Goberno, o salario mínimo e as pensións subiron en España respecto a 2018: "Os números non enganan", espetoulle ao líder da oposición. "É vostede para a política española "o que a criptomoeda de Milei para os votantes arxentinos, un colosal engano".

Milei, Trump, Bárcenas e Ayuso cóanse na sesión de control

Feijóo incidiu en que o Goberno subiu 97 veces os impostos e pretende que tribute o SMI convertendo os mileuristas en "os novos ricos da época sanchista".

Acusou a Sánchez de dedicar o esforzo dos cidadáns para facer cesións aos seus socios e "mordidas e pisos para a súa contorna e os seus ministros" e de permitir que en España sexa máis fácil ter casa se se ocupa ilegalmente que traballando de forma honrada.

"Como nos van respectar no mundo se a vostede non o respecta a vicepresidenta do Goberno? Como o van crer falando de aranceis se o maior arancel ponllo o seu Goberno aos traballadores máis modestos?".

Na réplica, o presidente do Goberno lembroulle que, cando chegou á política nacional, asegurou que ía facer política para adultos, e só achegou, dixo "loiadas e crispación".

"O señor Tellado, o señor González Pons e Miguel Ángel Rodríguez son os estadistas cos cales vostede comparte a estratexia política. Xente que ameaza nas redes sociais aos medios de comunicación para pechalos e utiliza datos privados para defender -dixo- o indefendible".

"Non sei se vostede non é presidente porque non quere, pero España -asegurou- non merece a oposición que vostede fai". 

Sánchez tirou de datos e lembrou a suba do SMI e das pensións aprobadas polo seu Goberno. Segundo dixo, España "lidera o crecemento económico en Europa".

O presidente atacou o PP co caso Bárcenas e coa xestión que Ayuso fixo durante a pandemia. "Aos sobresoldos de Bárcenas á dirección o Partido Popular seguro que non se lle retiña IRPF", ironizou. "É vostede para a política española o que a criptomoeda de Milei para os arxentinos, un colosal engano".

Montero defende que eximir de tributación o salario mínimo sería recortar a recadación

A vicepresidenta e ministra de Facenda, María Jesús Montero, indicou este mércores que eximir de tributación o novo salario mínimo implicaría "recortar a recadación" coa que se financia o Estado do benestar. Segundo explicou, o obxectivo non é aumentar a recadación, senón evitar que esta se reduza.

Os salarios equivalentes ao novo salario mínimo -1.184 euros mensuais en catorce pagas- xa pagaban impostos, subliñou, polo que, se agora se lles exime, traduciríase nunha perda de recadación que cuantificou "en case 2.000 millóns de euros".

Na sesión, o deputado do PP, Juan Bravo, acusou o Goberno de ser "unha máquina de gastar mal o diñeiro". A voceira popular, Cuca Gamarra, recriminoulle á vicepresidenta que "a banca Montero sempre gana".

María Jesús Montero defendeuse asegurando que os salarios equivalentes ao novo SMI pagaban 839 euros en IRPF cando gobernaba o PP e agora o 80 % deles non terá que abonar nada.