Sumar pide evitar unha "segunda oportunidade" para PP e Vox cunha repetición electoral

O líder do Partido Comunista de España e deputado electo de Sumar, Enrique Santiago, pediu "altura de miras" nas negociacións para formar un goberno progresista e evitar dar unha "segunda oportunidade" a PP e Vox cunha repetición electoral.

"Quen non sexa capaz de acordar debe ter isto moi presente. O 23X evitamos que España retrocedese nunha onda reaccionaria, e non podemos dar unha segunda oportunidade a quen quere ilegalizar partidos e incendiar Cataluña", sinalou Santiago en declaracións a Radio Euskadi.

O deputado de Sumar dixo que España está ante unha "oportunidade única para sacar adiante un goberno progresista que impida que a dereita e a ultradereita volvan incendiar Cataluña e España".

En relación coas negociacións con Junts para que apoie a formación dun goberno progresista, Santiago afirmou que xuridicamente "non hai impedimento" para aprobar leis de amnistía, aínda que asegurou que este asunto non se está negociando.

"Outra cousa é que durante a lexislatura avancemos na expansión de dereitos e liberdades e en reconducir conflitos políticos por vías políticas, aparcando calquera obcecación en intervir xuridicamente sobre conflitos políticos, porque iso non funciona", precisou.

Santiago afirmou que por parte de Sumar "non hai problemas" para alcanzar un entendemento con Junts.

"Somos razoables. Cando dous partes teñen que entenderse todos teñen que renunciar a algunha das súas aspiracións. É obvio que ninguén pode impoñer a unha maioría as súas formulacións, pero sempre se poden construír proxectos conxuntamente e non vemos difícil chegar a un acordo", sinalou Santiago, que defendeu a presenza de forzas nacionalistas na Mesa do Congreso.