Támara Echegoyen precisa unha gran remonta para entrar na Medal Race

Non está indo ben a competición para Támara Echegoyen e Paula Barceló. Despois dunha primeira xornada moi desafortunada na segunda houbo unha pequena mellora pero insuficiente para ter posibilidades de ir á Medal Race, para a que se clasifican as dez mellores. 

Ata o de agora ocupan o posto 17, afastadas das expectativas xeradas antes da competición. Comezaron cun duodécimo posto a xornada do luns, e na quinta regata tiveron a mellor actuación cun cuarto posto. Iso parecía elevar as previsións pero na sexta regata volveu a fallar a estratexia e afundíronse no 18º posto co que perderon case todo o que recuperaran nas dúas primeiras citas do día. 

"Estamos pensando nas posibilidades que temos cara adiante. A Medal Race non está demasiado lonxe e tampouco descartamos o podio. Precisamos dúas xornadas case perfectas pero a nosa determinación vai ser maior. O noso equipo nunca se vai render" asegurou a regatista galega á Axencia EFE.