Telefónica gana un 78 % máis ata marzo e confirma un dividendo de 30 céntimos en 2024

Telefónica obtivo no primeiro trimestre do ano un beneficio neto de 532 millóns de euros, un 78,9 % máis que no mesmo período do ano pasado, empuxada polos seus activos en Reino Unido e por un crecemento de ingresos dun 0,9 % e confirma o seu dividendo de 30 céntimos para 2024.

Segundo os resultados do primeiro trimestre do ano que publicou na Comisión Nacional do Mercado de Valores (CNMV), Telefónica, cuxo principal accionista é a Sociedade Estatal de Participacións Industriais SEPI e que encara a entrada dun actor no mercado (Masorange) que lle arrebatou o liderado en clientes, ingresou 10.140 millóns ata marzo, un 0,9 % máis.

Os seus resultados víronse afectados polos seus activos no Reino Unido, onde ten o 50 % de VMO2, que este ano rexistrou un resultado positivo de 45 millóns, fronte aos 188 negativos do mesmo trimestre do ano 2023

Acordo con Digi

Doutra banda, a multinacional española anunciou que espera alcanzar un acordo con Digi "nas próximas semanas" para a rede móbil a longo prazo, tras asinar ambas as dúas partes un Memorando de Entendemento (MOU) non vinculante.

Ata o de agora Digi operaba sobre a rede de Telefónica, pero coa creación de Masorange abriuse a porta a que o operador romanés cambiase de provedor por mor das condicións impostas pola Comisión Europea para a fusión Orange MásMóvil, que obrigaba esta última a compartir a súa rede con outros operadores.