TikTok retoma o servizo nos EUA tras o anuncio de Trump de aprazar o veto
TikTok retoma o servizo nos EUA tras o anuncio de Trump de aprazar o veto
O presidente electo anunciou que lle vai outorgar unha prórroga á plataforma para que siga operando
A rede social deixou de funcionar antes de entrar en vigor o veto que a obrigaba a desvincularse de ByteDance
TikTok anunciou este domingo que vai restaurar o seu servizo nos Estados Unidos tras o anuncio de Donald Trump de outorgarlle unha prórroga para que poida seguir operando.
A plataforma considera, nun comunicado, que o mandatario electo ofreceu garantías aos seus provedores.
"TikTok atópase en proceso de restablecer o servizo. Agradecemos ao presidente Trump por brindarlles a claridade e a seguridade necesarias aos nosos provedores de servizos de que non se nfrontarán a sancións ao ofrecer TikTok a máis de 170 millóns de estadounidenses", dixo a plataforma nun comunicado.
Segundo engade, traballarán co futuro presidente nunha solución a longo prazo que permita o seu funcionamento nos Estados Unidos.
TikTok deixou de operar este sábado no país despois de que o Tribunal Supremo avalara o venres unha lei aprobada o ano pasado polo Congreso, que obrigaba a plataforma a desvincularse da súa empresa matriz, a chinesa ByteDance, se quería continuar activa.
A decisión de TikTok aplicouse unha hora e media antes de entrar en vigor a lei, prevista para as 00:01 do domingo, hora do leste dos Estados Unidos.
Segundo o Goberno de Joe Biden, TikTok tomou esta decisión por iniciativa propia. Tras a decisión do Supremo, a Casa Branca anunciou que o actual executivo non aplicaría a lei e que o seu cumprimento quedaría en mans de Donald Trump, que asumirá a presidencia este luns.
Orde executiva o luns
Trump asegurou este domingo que emitirá unha orde executiva no seu primeiro día no cargo para permitir de forma temporal que TikTok continúe operando e engadiu que lle gustaría que os Estados Unidos asumiran unha propiedade parcial.
"Gustaríame que os EUA tivesen unha participación do 50 % nunha empresa conxunta. Ao facer isto, salvamos TikTok, mantémolo en boas mans e permitímoslle seguir crecendo. Sen a aprobación de Estados Unidos, non hai TikTok. Coa nosa aprobación, vale centos de miles de millóns de dólares, talvez billóns", escribiu na súa rede social, Truth Social.
