Todo listo para o derradeiro adeus a Isabel II: o funeral de Estado hora a hora

Londres dálle o último adeus á raíña Isabel II nun funeral de Estado que se prevé como un dos eventos máis multitudinarios que viviu este país nas últimas décadas.

O centro da capital británica cortou numerosas rúas ao público e hai unha visible presenza policial en case calquera recuncho. Todo está listo para a histórica cerimonia que se vai celebrar na Abadía de Westminster.

Está previsto que máis de 500 personalidades da esfera política mundial asistan ao evento, o maior coordinado polo Ministerio de Exteriores británico en tempos modernos. De feito, despregou un dispositivo de seguridade comparable ao dos Xogos Olímpicos de 2012.

É o primeiro funeral de Estado que se oficia no século XXI no Reino Unido, que non viviu cerimonias similares desde a morte de Xurxo VI, en 1952, e a do primeiro ministro Winston Churchill, en 1965.

Unhas 125 salas de cinema emitirán o evento e tamén as canles de televisión Sky News, ITV e a BBC para as persoas que sigan o funeral desde os seus fogares. A TVG emite un programa especial a partir das 11:40 horas.

Programa das exequias hora a hora

-7:30

Pecha a capela ardente de Isabel II no palacio de Westminster, instalada desde o mércores, pola que pasaron centos de miles de persoas para darlle o seu derradeiro adeus á soberana.

-9:00

As portas da abadía de Westminster abren para a chegada das personalidades ao servizo fúnebre, que comezará tres horas despois.

O presidente dos Estados Unidos Joe Biden e cabezas de monarquías de todo o mundo, incluídos Filipe VI e Letizia, estarán presentes na cerimonia. Tamén asistirán os reis eméritos.

-11:35

O féretro da raíña depositarase sobre un carro de canón de artillería e abandonará Westminster Hall a partir das 10:44, hora local. Membros da Mariña Real encargaranse de transportalo en procesión dende a sede do Parlamento ata a contigua abadía de Westminster.

O novo rei Carlos III e os seus tres irmáns —Ana, André e Eduardo— mais os seus fillos os príncipes Guillerme e Henrique camiñarán tras os restos mortais da soberana. 

-12:00

Ante uns 2.000 convidados, comeza a cerimonia relixiosa na abadía, o mesmo lugar onde Isabel II foi coroada raíña en 1953. O último funeral de Estado por un monarca británico que se celebrou no templo londiniense foi en 1760, tras a morte de Xurxo II.

Desde aquela, as cerimonias fúnebres leváronse a cabo na capela de San Xurxo, no castelo de Windsor. O deán de Westminster David Hoyle oficiará o funeral, e o arcebispo de Canterbury Justin Welby dará un sermón. A primeira ministra británica Liz Truss lerá un texto relixioso.

-12:55

Unha chamada de corneta marcará o comezo de dous minutos de silencio, que se respectarán en todo o Reino Unido.

O aeroporto de Heathrow paralizará as engalaxes e aterraxes minutos antes para garantir un rigoroso silencio na capital británica.

O himno nacional e unha peza de lamento interpretada polo gaiteiro oficial de Isabel II poñerán fin ao servizo fúnebre ao mediodía.

-13:15

O féretro sairá en cortexo fúnebre desde a abadía cara ao arco de Wellington, na esquina sueste de Hyde Park.

O Big Ben, a soada campá da torre do palacio de Westminster, repenicará a intervalos dun minuto durante a procesión.

A Real Policía Montada do Canadá encabezará a marcha, na que tamén desfilarán membros das forzas armadas do Reino Unido e países da Commonwealth, representantes da policía británica e do servizo de saúde pública (NHS).

Carlos III camiñará xunto con outros membros da familia real, mentres que a raíña consorte Camila, a princesa de Gales Catarina e a duquesa de Sussex Meghan seguirán o cortexo en coche.

-14:00

No arco de Wellington, os restos da soberana transferiranse a un coche fúnebre para facer a súa derradeira viaxe cara ao castelo de Windsor, uns 35 quilómetros ao oeste de Londres.

-16:00

O féretro chega ás inmediacións do castelo, onde viviron 40 monarcas de xeito ininterrompido durante case mil anos. Unha procesión a pé percorrerá os cinco quilómetros do Long Walk, a característica avenida arborizada que desemboca na residencia real.

-17:00

Os restos de Isabel II entran na capela de San Xurxo do castelo, lugar habitual de bautizos, vodas e funerais reais. Nos últimos anos, acolleu o enlace entre o príncipe Henrique e Meghane e o funeral do príncipe Filipe, esposo da raíña.

Unhas 800 persoas convidadas asistirán a unha cerimonia oficiada polo deán de Windsor David Coney. A Coroa do Estado Imperial, o orbe e o cetro reais retiraranse do féretro, separando por última vez a Isabel II dos símbolos do seu reinado.

O cadaleito descenderá cara á cripta real da capela, onde tamén están soterrados os restos do seu esposo, falecido en 2021 con 99 anos.

O gaiteiro oficial de Windsor interpretará un himno elixido persoalmente por Isabel II e a cerimonia concluirá coa entoación do "Deus salve o rei", ao redor das 17:45.

-20:30

Isabel II será enterrada xunto ao príncipe Filipe nunha cerimonia privada á que asistirán membros da familia real. A laxe de mármore da súa sepultura quedará gravada coas palabras: "Elizabeth II 1926-2022".