Traballo eliminará o despedimento automático para persoas con invalidez permanente

A vicepresidenta segunda e ministra de Traballo, Yolanda Díaz, anunciou este venres que se vai modificar a lexislación para eliminar o suposto de extinción automática de contratos de traballo no caso de invalidez permanente.

Díaz anunciou que "con carácter inmediato" vai modificar o artigo 49 do Estatuto dos Traballadores, onde se recolle entre os supostos de extinción de contrato a "grande invalidez ou incapacidade permanente total ou absoluta do traballador".

Díaz explicou que as persoas que sofren unha invalidez permanente de distintos graos levan asociadas nalgúns casos a extinción automática do contrato de traballo, isto é, o despedimento.

"Imos emprender unha modificación lexislativa para que xustamente as persoas que están vinculadas a estas invalideces permanentes e que están afectas á lexislación en vigor non se produza automaticamente o despedimento", engadiu Díaz, que explicou que esta era unha reclamación do Comité de Entidades Representantes de Persoas con Discapacidade (CERMI).

"Imos lexislar como pide CERMI para propoñer a eliminación da extinción automática nalgunha das formulacións de discapacidade permanente", subliñou cuestionada polos medios por esta medida.

En 2020, Díaz xa sacou adiante a derrogación do artigo 52 d. do Estatuto dos Traballadores, que avala o despedimento obxectivo por baixas médicas acumuladas por un tempo determinado.

En canto á demanda de UXT ante Europa polo despedimento en España, a vicepresidenta segunda sinalou que se vai emprender unha reforma sobre o despedimento no marco do diálogo social.